Хал ду ме? Амма къерекъелдив е якIв, е сасра зад фавейдава. Са Iайи Iегвал хьуне зас джакьвар: фидегьен четин те кIвахIарис чиппин мугар акьас, са задра фадавай. Хиялин хьуне зун: фиштти кумак акьас хьасе гьан завас джакьварис?
Гъилар ккикIас тебурикк хьасттава. Хуппай якIв? БицIи якIв джикIес хьасе. ДжикIине зас бицIи якIв. Фай тера гьуккай ушуне зун багъди. Хъуландея зун, тисаъ суьр Iуьшан джакьв ая, са уркIал аларуцай.
Хабар гъушуне зун тивас:
— Е джакьв, четин ду вас якIвра фадавай муг акьас?
— Зун мугар аркьайдава, – джуваб йине зас. — Хъуттурф нандиъ айчин зе гъурагъалар. Гъайшине ме мугуйилас – муг э са IуькIеригI гIая бицIи уркI, тисаъ Iу гъурагъалра ая нур ирцIанди. Мис е гъилар лазим дава, е якIв. Мин муг – уч бицIи уркI. Фера фадавай джикIине ми учис чаркквар арта мукь.
Гьуккай ушуне хъара вархалди. Аттархьуне нецIухъди. Тисахъ хъая сасра джурейин джакьв тисалас мич, мидас тич алдишай къугъ гIаттирхIай куларигIасна кутIуларигIас. ХIинкIакIай – джакьв.
— Фиттис герекди аяфе вас ле къугъ, джакьв? – хабар гъушуне зун.
— Зун мебурикес муг аркьа. Зе муг къугъдинф э.
— Дахьучин мисра фиттисра дава якIв, къукъ якIв фадайра ве.
Ушуне хъара.
Аттархьуне хулагъилди. Хъуландея зун, хулагъин кIенакк, айвандин гъвадик муг аркьай сасра джакьв ая. Учин муулилди бетIур кидаркай, муг аркьай зурзумарикесна бетIурикес. Лисра лазимди адава зе якIв.
Ушуне дарагIди – тисаъ сасра джакьвар ая. Амма сайисра зе якIв лазимди адавуйи. Йина лиIурас зе якIвра, учин мугуйин кутIулигI гIикIас тин пухIела, адине зун хулаъди.
Гьер са джакьвалас муг акьас учин Iемал ягIа. Сайисра якIварна, гъадар лазим вейдава.
Батитай Габибулаева
