Адине Iели Iебай армиас. Тидас адехаб акьуная ми хизанра. КIилил эессира алдавай ппара четинди ухIуная мебурин баба шиникквар. Хизанар дуламиш акьас хаб ушуная ме колхоздиъ лиханас. Мактабин хурубра кидавагуна джуре кар мис алчархьуна адава. Фас вун мактабиъди душуф пуна суал алихьугуна, джуваб йине ми: «Баба раккаас ачакайи зун мактабиъди, зун тIагариас айчIуна гьишайи, ккандавуйи зас хурас. Фас пучин IуьтIуб адавуйи дегIвин вахттари, джандихъ кьуват хъувейдавуйи карра акьуна дарсар хурас».
Ягъуй колхоздиъ кардил, Iуьшуй хулар акьас гъванар аттивай ахьуная ми. Са багухъасра са кумакра адавай ппара джафадалди гъадивуная ми хал.
Колхоздин кар акьубан ягъар ирцIанди ахьуная мебурис. Ягъар ирцIанде пугуна миштти и. Са исан колхоздис хьуна хайир пай аркьай ахьуная вахъ хъая ягъарис. Кар акьубан манатара ирцIанди, кьур, нис, ччам алчархьайи агъа.
Хабди цIегIуьфу исаридегьен хьуная микес банкунин къаравул. Банкуниъра учин кар бегьемвел фай аркьай ахьуная ми. Ягъуй алгъузуна ачадартай инсанар, Iуьшуй ул алийинара гъадархьай гъатай ахьуная. Са ягъа кIвал аркьа ми уч Iуьшуй къаравулдиъ ай пул ая мукь угагъилди. Хабар хьуна дахъуна ачушуная ме, верегунас цалик кея сигнал ирцIан усак керхьуна ахьуная цIа. Учивас вередегьен хьеттар ичиная ми, фишттира кеттудушуф, йирхIуна якIвала кейхьуная ми, кьабахъас алчихьуная учихъ хъацуная буфайкара. Са бицIиди ичира гъафил хьухаб джалла усар угаси.
Ме кардихъас мис хIуькумати йиная иджи кар акьуне пуна грамотара. Хабди мисан къаравулвел аркьагъилди хьуная милицабури. Iели Iебай мидас айчIухаб, гъузуная кардил рекъерихъ хъулан идарайиъ. Мисаъра са хубджи исара лихуная ме угъал, ибхь дагъай, рекъер мертт аркьай, дагьарикес адахъу гъванар гьаттивай, рекъерик кичархъай, ккерчIу усарикк цалар ккеркьай. Ме кар акьуб кидавай мин гъиларилас алайшуная гьер усариъ акьуна мугIар.
Хубджи манзили рекъ йирхIас алчархьуная мис ме кардил. Четинди ичинра къа истти кар акьун, яшра хьухаб айчIуная Iели Iебай кардилас, рехIетти гъуланди хIуькумати ирцандея пенсира экьвас э пуна. Амма идарайин цIае хьуна хIатти хулаъди рукьуна адина, хаб унахъуна файшуная ме. Хъара са ерхьи иса сара кар акьуная ми рекъерил. Джалла алчихьуна са къана ерхьи ис Iуьмурдикес фатуная ми рекъерил, инсанарис иджвел бадалди.
Iели Iеби агьалра агъа рекъерис ачатудегьен исарихъас уч пушмалдава пуна. Гьавайин гафарар дава мебур рекъер, мугIар акьуттарис ппара саваб ая пуна.
Учин Iуьмурдикес са ягъара кар фадавай экьу инсан дава ме. Агьалра яш хьуна айчинра учивас агърукьа курар аркьай аме Iели Iеби. Джандихъ сагъвел хьурай учин хъара, учин хулас, хизанарис муфеIэт кея курар акьас.
Батитай Габибулаева
