Хье дуьйил халкь акьуная ппара гьер джурейин емишар. Гьер емишикес инсандис муфеIэт кея гьергъилди. Хьин мегелай ахъакьасе инжирдихъас. Инжир ппара тамашин емиш э, ме емишин муфеIэтихъас медицинайи суман хье диндиъра ппара ликIиная.

Инжир хIисаб аркьа лап авалдинф, хъара сад пе емиш хье дуьйил. Ке удигьай инжилдин цIабар ишламиш акьуная Адамана ХIавайи. Бинайин мукь инжирарин э Южная Аравия. Аравиас инжир адиная Сириъ, Египетиъ, Грециъ, хуппай рукьуная хье мукьарихъди.

Ая ппара джурейин инжирар, хIапай ишламиш аркьа инсанари кIареттар, джагварттар, хъара ая исан арайиъ Iугелай мехIсул ирцIан джуребур, гебур хье мукьариъ ппара ишламиш аркьайдава, фас пучина ге джурейис кканве ппара ибгIа мукьар.

АгъучIа ме емиш ибгIа мукьариъ, ппара гьава дава кIурарил. Хъучархьа инжир цулана. Хъучархьугъилди завал акьуна кканве, фас пучина ппара гагьди мебур атас вереттар дава. ХIапай инсанари аркьа ме емишикес варенибур, авала инжир ухIай рукъас акьуна. Фиштти ухIучинара, ме емишин учин муфеIэт гуландава.

Дармандис пуна ишламиш аркьа, йиркIв иттаттарис, мухур хъаттарис, неккухъай ирцанде лекIуьн воспаление аяттарис. Ппара хайир кея емиш э инжир.

Наибет Гасукаева