Гьер иса бусулман халкьари аркьа лап зурба хIуьлматлу хIаягъар. Сад пеф, Рамазандин вазалан ахир ягъа, сивар ухIуна ккиркIухаб. Iуд пеф, Кьулбандин хIаягъ. Хъучаве ме ягъ Зуль-хиджайин вазалан йицIуд пе ягъа.

Кьулбандин хIаягъ агъафе (Ид аль-адха) фас пичина, Ибрагьим пайгъамбардин вахттарилас адинае хье диндиъ ая гIедат э бусулман халкьдис. Ме ягъас гIезурвелар аркьа Рамазандин хIаягъ ккиркIухаб. Гьер инсан алучIа гIайшуная сивар фацанас савабинттара хъай, ният акьунаттари ХIадждал вес, хъара хIезур акьуна арта ме ягъас руккаттар кьулбан акьас гьертти учихъ хъаяф: вец, хIуни, укьар, хIуб, цIегь, деве.

Рукка гьертти учин мункинвел аягъилди. Мисаъ ая шартIар: руккаф хьуна кканефе батIар йякку аяф, ягъниш кедаваф, Iатте даваф, руккаттин хьуна кканди ая гьерттин учин вахтт. Вец, хьуни Iу исанф, деве гIуьфу исанф, укьар, хIуб, цIегь са иссанттар хьуна кканди ая. Вец, деве, хIуни руккас кея ери инсандихъас, хIуб, цIегь, укьар кея са инсандихъас. Руккубар акьуна кканефе багамин къулгун акьухаб, рагъ фагъучIун хубджи киркьвасттегьен.

Аркьа ме хIаягъ хьибу ягъди. Ме ягъа хулан эесси багамин къулгун акьуна, руккас хъучучIа. Рукку якк хулан эесси квал аркьа ери хулас, са пай арта учис. Якк йина кканефе гIеджизарис, етумарис. Хумбари аркьа хулан мерттвелар, хIезур аркьа гьер джурейин ямагар. Ме ягъа алчаве багу-кIилинттар. ХIаттар суман бицIиттар шатти гъузуна аве ме ягъахъ чиппис ширин хъайфатар завал акьас. Баракат хьурай гьерттин хулаъ.

Наибет Гасукаева