Ме дуьйил яратмиш акьуная инсанар суман нахширара. Агубарис гьава джури ичинра инсандилас Iэкьулдин куми дава мебур. Чаб нахширар ая зарар кеяттара кидаваттара. Зарар кеяттарихъас гъургъучин, ке удигьай пас хьасе хIучахъас, фас пичин сагелай мин силебаригI гIачархьехаб ккертайдава ми фушра.

Хье чIирариъ ке ппара ая нахширар гьемебур э пас хьасе. Инсандис зарар ирцIанфра ке ппара ми э. ХIуппар, малар агъайдава ми учис гаш хьехаб. Удигь гьучархьефра ккертайдава. ГIулин чIириъди адику мал, хаб хулаъди адесе пуна муш кевейдава хIуч багу верехIела. Iурдана чIириъ фера фачадархьехаб, хIуригIди гIади вахттара кегьей аве хIучан.

ХIа инсанари агъафе диф гIукугуна хIуч багу верефе пуна, амма сагелай хIучас гаш дахьурай ягъ-Iуьш, рагъ-диф агъайдава ми.

Агубарис хIуч ухшар э гъварас, сасуман джандин ирхевелра гьава лекара ккея. Амма сурат ухшар э сулас. ХIапай хIучар са кьайдайин джан хъаяттар э. ХIа джан аркьа мекIил мукьариъ аяттари. Мишттинттар ая Сибирдиъ, килаварилди хIисаб акьучин, гебуриъ ая верш дегьен, са митIри ирхевелра ая джандакиъ.

ХIучан сивиъ ая ягъцIурна Iу силеб. Уларин ранг ке цIайи чарккв хегуна чулли аве, хабди хьибу вазар верегунас кIурандуракьин ранг ата. Кьудакьил алдея чIичI Iу джаранф э, ке варттал але чIичI такьв фадарцанф э, кIенаккеяф джан Iашас адартаф. Хъара чIичIи джандин ибгIавелра фартай дава, идехIела гебури ке мекIер ая мукьарин гьава гъадиваф. Гьер джуре рангаринттар ая хIучар: джагварттар, кIареттар, буреттар, руькъуьн рангунинттар.

ХIучарис унихьуб иджи ая, Iекв чIукь ая, ппай ниар хьибу агъзур митIринди удигьди ве. Iайи зурбадалди гьуккаттара э нагагь Iелеттин ниъ хьехаб.

Фикир акьугуна зурба нахшира э, зарар кеяфра э. Инсанари тIалаб аркьа гIурчахъанарис хIучарихъди гIурчади вес, сара инсанарис зарар даес. Эгера гIурч акьуна хIуч кIес хьехаб, гIурчахъанари алдахъуна кьудакь батIар кьиматигьас масса ирцIанде.

Батитай Габибулаева