Мал-къара хъая инсанарин кар ппара джафайинфе. Малдикес муфеIэт кеттивастти эессибури гъил фаттивун кканвейдава. Ве ахъаджихIувелдихъ хъуттурфуна вас хъуьссура ицIанде. Авал заманайин инсанарихъ хъуттурфуна гьалдинттари алтухъди ухIайра андава. Малар хъаттарилас хъудаваттар ппара хьуная, амма ухIахаб алтухъди ухIасра алучIа.

Са-садари ухIас алучIа чIире малар хабди якк фацухаб масса йина пул акьас, ппай гIане малар хъаяттари кьимат аттива неккдикес. Неккдин къафун ппара э. Микес аркьа джар, джарукес ифал, ифаликес ччам, хъара нисра, муталра. Ке загьматилди мебурикес аркьаф ччам э. Ке удигьай завал акьу неккдикес бицIи кьацI икIагъилди ибгIа акьуна йирхIа джар, гикес дакьуна хъучихьа ифал, гьуркIадегьен килавар хьегуна уьцIуна аркьа ччам.

Авала ме кардис хъара четинвел уйи, фас пичин тегуна агьал суман инсанарихъ хъудавуйи ттукун некк ата машинар, уйи гъилин машин са йирушилди руцай йирхIайи джар, е тегIди руцун канвейдавуйи е яваштти.

ХIа инсанаривас хабар гъуюгуна ахъаркьа, дадарин вахттари инсанари малар ухIайи сувариъ. ХIуригI малар хъая эессибури чипихъ хъая гIане маларикес сад-Iуд гIулинди агъикайи суваъди, чиппис са малдин кIилил са бадра ччам акьастти, хабди аме гагьди лебури чипписра муфеIэт кеттивагъилди. Тегуна хъара загьматилди аркьай хьуная ччам. Гъилин машинара кехIей адавай неккдил алгъархье джар алттаркуна завал аркьайи даркьан гваралаъди, хуппай дакьуна хъучихьайи хьуная джарукес ифал, хабди гикес аркьайи ччамра.

Батитай Габибулаева