Хъучадине гIул. Ме вахтт ке идже вахтт э ая исан вахттарикес. Фас пучин, гIулин ибгIавелдихъди инсанарин тIушубра ппара ве, тIабиIэтин гьавара батIар ве. Iурдтти инсанарин йиркIураъ акьас ккея курар, гIул хьегъилди башламиш аркьа. Хал аркьатти хал аркьай, ккерчIу усариъ цалар ккеркьай, хьед адатти хьед дивай, ге курар кидавай байирдин курар аркьа, хуппурар узай, гIуяр кикIай.

Ме вахттуни хье тIабиIэтра ппара ухьтанди аве. Гьавабурис ул йирхIугуна, хъуланди ул арцIайдава. Ругун ранг алдея дагьарар гъазе ве, дарариъ ая кIурариъ цIаб архъа, чIирариъ музе IуькIна тук архъа. Тукарихъас гъургъучин хье чIирариъ ада джурейинттар адава. Амма ке Iайи джаллайисра кьабул ве гьеме джагвар гуьлге суман адахъу джагвар тукар. Вахтар ккетушуна мактабар ккиркIуна инсанари йиркIурал аркьа, фиштти чиппи завал акьас вереф ичин ме тукар, мактаб ккиркIва ягъа (25 май) мегIелимарис йис.

Хъуттурфучин ме тук ада усра адава, амма мин ватан э пас хьасе хьибу сув. Сувалди алгъадигъилди дагьарарин батIарвелра кехIей хум ве ме тукарин майданар агугъилди. Найч ул йирхIучин гьетисаъ ая ме тук, лек ишина аруцасра кехIей Iегвал верегъилди. Ме тук архъа вегIдайи гьавабурил сурара агъархъа. Сурар акьас ушудегьен инсанари ме тукаригI экьуна са ишкил дирхIунара, хабди са-са кIунчч фадавайра вейдава.

Батитай Габибулаева