Гьер са задттил: шагьурдил, инсандил, нахширил, — алдея ттурар. Гьемебурин суман гьер миллатин, гьер са хIуриъ ая чIирарихъра хъая ттурар.

Типпигъарин хIуриъ мишттин мукьар ппара ая. Сад гебурикес э «Ери цIудар» агъа мукь.

Ме меъдан ая хIурилас рагъ афучIа гъванкIар багухъ, семехьи гьучадаркуна вартти хIурис. КIенаккес вартт хъуттурфугуна, са садарин хиял ве ппара варха э пуна гич алгъавес. Амма вархавелдихъ хъуттудурфуна мал къара хъая инсанар айчIуна ве байирди.

Сайишттира мич алгъаве шагьурариас, ппатталас аде джигьилара. ХIуригIас хъуттурфугуна ле цIудар кьацIра датIурша инсанар суман ве. Фи э гьан пуна алгъавесра кканве. Лич алгъушухаб джурейи бахил ве ле мукьарил. Гьучадаркуна аргва хIурин манзилар, хулар, дагьарарин кIукIар, хье ухьтан табиIэтра.

Джалла ле ус агудегьен инсанари алихьа са суал: фикьас акьунафичин мисаъ ме ери цIуд?

Ме кар бадалди хабарар гъушуне хIурин хIа яш хье инсанарифас, амма сайифасра дуздин джуваб ес хьундава. Гебурин чIаларилди, мебур акьунаф лап авал заманайи э, ке цIайи гьеме хIур ккийигунахъас хаб.

ЙиркIв алийихаб гьер джурейин тарихар унихьа. Сасадари агъа, мебур акьунаяф хIуьппехъенарис рекъ ягIар акьас пуна э. Сурин чIаларилди, гьеле цIударилди ягIар аркьайи агъанин вахтт; джуреттари агъайи чIирин нахширарис гучI хьурай пуна, инсанар суман хьуна хIуригIди аладаес.

Хъара гьинас фи ягIайчин чунра ахъакь.

Батитай Габибулаева