Алттушуне Iурдин ирхе Iуьшар, джикъе ягъар, гьучадине хьидин курар. Iурдин алтухъ кар адавай экьуб, хьидана кегъарцIа инсанарикес. Хьид хьегъилди хуларин багулив гIан, бустан аяттари хъучучIа чиппин иде-дава курар аркьай.

Ке удигьай мал-къара хъаяттари, чиппи Iурдтти завал акьуна фурдар ахъуна гъа хуппурарилди, хъудаваттарисра ирцIанде. Хабди алархъа хуппурарил даркагунас хIезур аркьагъилди. Хуппай уза гIуяр, кьурар. Амма гIуяр чара адавай IуьтIанас узайчинра, алтухъ джафа акьуна кьур узас алучIай андава. ХIа пай хуппурар чIири атуная.

Гьал инсанари ппара узас алучIа гьер джурейин емишин кIурар: гьечарин, джихерарин, хутарин, машмашарин. Узухабра гъил фаттивун кканвей дава мебуривас. Сад сайис мушат кея рукъу кулар кейхьуна, агIатуна дарман кираджигI акуранде милехъвари, зибзари зарар дакьас.

Ибхьер уьцIуна са бицIи джилиъ бугъ архьегъилди хъучучIа бустанариъ узас гьер джурейин хабди инсанарис мехIсул ирцIан задар: кьутIар, каламар, турфар, чIичIакIар, сергар, IуькIер. Мебур узастти мисахъра батIарди ахъаджихIун кканве. Сагелай гъилилди йирхIа бер гIадархъай чIире IуькIера, те-ме узастти самуз гIанира акьун кканве, гьер са задттис хъудуьхьуь лакабура аркьа. Хабди ахъаджихIунра кканве чIалар аркьай, хьеттар ирцIанди.

Амма цулана батIарди мехIсул алчадигуна акьудегьен загьматара кIвалас ве, йиркIвра шад ве.

Батитай Габибулаева