Хье дуньяйил халкь акьуная задарикес инсандис яшамиш хьас ке лазим вереф э хьед, кьел, цIа. Хьед лазимвелдис суман хайир кея задра э, цIа ибгIавелдис хъара сайишттира ккан ве, амма кьелан муфеIэт, лазимвел, кьимат ппара аркьайдава, фас пучина хIапай агьал заманайин инсанари хIисаб аркьа кьелакес инсандис зарар ппара кея хайир дала.

Ппара тамаша э, хьин фидегьен гьер джурайин батIар ямаг акьучинра, кьел кедахаб итте вейдава. Ямагин дад аркьаф кьела э. Авала холодильникар ппара адава вахттари хIапай Iеле шейъ ухIайи кьела икIуна. Ая кьелар гьер джурайинттар, гъвандинф, столовый, хъара хIуьлин кьел.

Гъвандин кьел аттива джилиас, хIуьлин кьел завал аркьа хIуьлин къирагъихъас. Хъара ая гьер джурайин рангунинттар. Ямагарис ишламиш аркьа музе джагвар ударарин кьел, гъвандинф ирцIанде хIапай маларис хIуппарис.

Авала са пай инсанарис кьел ишламиш акьас дагIай ямагин тIем хьас алчархъай хьуная руькъ, хIуьлин хьед ишламиш аркьай хьуная ямагарис. Хуппай ягIар хьуне хIуьлин къирагъихъ алгъархьуная музе джагвар ударар завал акьас. Са вахттуни кьелан кьимат гъайшине, хьуне замана кьелна къизил сад суман кьимат ая вахтт. Са пай миллатарин агьалра хье пулун ттур кьелулас алттинаяф э.

Агьал заманайиъра кехIей ая джалабурин гIедат, адиная хIулматлу гIалашуварис ке удигьай ирцIанди кьелна гуни. Хье диндиъ хьес агъа ке удигьай ямагис тIем акьасти кьелан удар алахъуна кканве мезурал. ЯмагаригI суман ишламиш аркьа джерехIвелдисра. Дарманар ппара адава вахттари йирхIунар сагъ хьас ишламиш аркьайи кьел, кьелан хьед.

Кьел уч инсандис ппара муфеIет кея зад э. Амма ягIай канде кьадар. Ппара алтухъ са задунира хайир ирцIандава инсандис.