Девлетлу дадахъ хъахьуная са кIиркI. Са ягъарикес са ягъа иттар хьуная дад. Уч луькIеяф хабар хьуна, унахъуная ми учин кIиркIас.

«Зун луькIея, — пуная ми, — дехIела зун вас йисе хьибу насихIет.

Садпеф: вун удигьай салам майирцIана.

Iудпеф: гьер Iуьшуй IуьтIен фичира итте шейъ.

Хьибудпеф: гьер ягъа багамикестти аликI цIае лекар».

Ме насихIетар йихаб ппара вахтт алттушуна адава, кIиная дад. КIиркIа учис дада петтар аркьай хьуная. Удигьай саламра дайирцIанди, гьер Iуьшуй Iелди ахьуная иттефра, гьер ягъа багамикестти аликIай хьуная ми цIае лекара. КIилди учис дада педегьенттар аркьай хьуная кIиркIа. Са вахтт алттушухаб, е гъургъаф андавуйи михъай хIуриъ, хъадегьен пулара ккиркIуная мин лекарна иттеттар гъуланди. МуьхIтал хьуная кIиркI, фас ичин миштти хьеф.

Ушуная ме учин бабалди. «Зун кIилди дада петтар акьуне ба, — пуная ми, — амма зас иджевел хье багв аргвай адава. Фасегьан дада зас мишттин насихIетар йиф, яраб дада Iайвелис петтар эгьан зас мебур».

Баба пуная мис: «Зас дада вун заалди дайдина магъа пуни вас фера. Вас дада йидегьен насихIетар дузди фацун дава вун. Удигьай салам майирцIана агъа насихIет: вун джаллабурилас дахи гъайшина ушуна кканде лихунилди. Вагьас гьаттвере инсанари вас йисе удигьай салам. Гьер Iуьшуй IуьтIен фичира иттеф пеф: вун кIилин ягъди кар акьуна бизар хьуна байирдиас адигуна, вас фи IуьтIучинра итте хьасе. Хьибудпе насихIет: гьер идеми алгъузуна кканде учин кунар–лекарин мерттвелил. Iуьшуй димари мертт акьуна къайгъу акьуна кканде багами аликIа лекунра, кандинра. Багамингуна аликIа мертте кандис и вас дада пеф хьибудпе насихIет».

Гъавурдиъ архьуная кIиркI учи акьу гъалатIарин. Ме ягъалас тич кIиркIа аркьай хьуная учис пе насихIетар дузди. ХIуринттара дуьхьуьная михъай, девлетра хьуная. ХIуриъ ая ке батIар рушра акьуная учис хьирди. Дада акьу насихIетар йиная ми учин шиниккварисра.

Луиза Гусукаева