Имбирь инсандис иджвелра Iайвелра кея гIуькI э. Iелеттар аркьагуна гIахъуб кедавай, имбирьдик иттаттарис дарманвелра ппара кея. Миштти идегуна джерехIерин дарманаригI ппара вахттари гIаве имбирь.

Мин иджвел ягIа авалдихъас мич. Ппара кумак аркьа мекI хьугуна, мухур хъархьугуна, грипп хьугуна, хъара забун хьас кканеттарис.

Ме IуькIуьн муфеIэтихъас ппара ахъакьас хьасе. Учин муфеIэтлувелди джалла иджвелин IуькIерин ке удигь гьая ме. Имбирьдин ватанар э Индия, Юго-Восточная Азия.

Хьефас гъушанас ве базариъ, дуькандиъ, аптекайиъ.

Уч имбирь Iеламатин IуькI хIисаб аркьа, фас пучин мин хьед акьуна йичин агъуйиккес къутармиш аркьа инсан, сагъ аркьа йирхIунар, кIес аркьа джалла микробар, бактерибур.

Исан вахттарин раджар гIаттегуна ке Iайи гъиликк ккей кканве мерI. ФатIуна сивиъ агъихьуна чIуркьучира, чай акьуна ухучира кумак аркьа иттали алзидиянас инсандин джандил. Iурдин вахттуни иммунитетра цIуппе аркьа.

Ппара ая инсанар ирккариъ, дамарариъ Iуьрар аркьаттар. Мебурисра иджи кумак хьасе гьер ягъа чIукь-чIукь аркьай гIачихьучин чиппин IуьтIубагI имбирь, алихьучин ругIуна аш суманф акьуна Iуьр кея мукьуйил ибгIавелра акьуна, мерIуьн ччамулди тIишичин.

Имбирин ччам: музе акьуна таза имбирь алгьарта набататин ччам, кейчIвас Iу-хьибу хIефттайи мучIе мукьуйиъ. Хабди ишламиш аркьа гереквелдис.

Кумак аркьа ми хъара кьуркьарис, астмайис, сахарный диабетис, асхъаярис хъара сасра итталарисра.

Амма Iайвелихъди алдарка иджвел, эгена хьин йичин ме иттай кучи аяттис, къарфунин итталар кеяттис. ДехIела гьер инсандис ягIай кканде нае вахттуни фиштти ишламиш аркьайчин имбирь.

Салихат Малагусейнова