11-пе июньди Федор Щукина ишттарак акьуне Дербентский райондиъ «Патриот» агъа парк дархъа мегIракайигI. 200 агъзур квадратный метрдилас вартт манзилил арайил акьуная шиниккварис ватанперасвелдин тарбия ирцIан задар, эл ккерта мукьар кIилди. Мич адиттарис аруца аллеябур, спортивный площадкабур, амфитеатр, военно-тактический дурухIубар, музей, смотровая площадка, бицIиттарис дурухIалар аркьа мукьар кIилди ая мисаъ.

КIилдин фикир лайикьди ая военная техникайис: самолетар, советхIуькуматин надир яракьарин образецар. Ке яIанин экспонат э кIилди дуьньяйиъ сад иде «Лунь» агъа ракетный экраноплан.

МегIракайил гъургъагуна Федор Щукина ахъакьуне культурайин, ватанперасвелдин, диндин тарбияйин рекъуьъ джигьиларис ме объектив фидегьен хIа мукь файчин. Мин чIаларилди, ме гьакIанди джемеIетин мукь дава, хье алттушу несиларинра гьалдин эскераринра дженгеринра гьунарарин хIуьлмат, ватандин хабдин Iуьмурдихъас джувабдарвел ухIубан ишанра э. «Хъара иджи э ме парк Дербент шагьурдиъ дахъуф, дагь заманайин, ацIуна азиятар алайшу къалайин цаларихъди багуйи, Каспийдин къерехиъ, мисаъ сад ве тарих, гIилми, спорт, культура, хъара хизанарин аруцубра. Зе хъугъуб хъая, ме «Патриот» агъа парк, шиниккварис тарихихъди хIуьлмат ягIар аркьа, хье халкьарин садвел цIуппе аркьа мукь хьасе», — пуне ме. Федор Щукина хъара хъучихьуне, парк «Патриот» — ме кIилин Северный Кавказдис ке надир центр э, ватанперасвелдин тарбияйин, тарихин фикир ухIубан, хъара хIуькуматин игитарин гьунарарихъай таниш хьубан рекъуьъ. «Къуй гьаме мукьуйи гьемишанди кIвал акьурай хьес ислехIвелдин кьиматихъас, хье миллатарин садвелдихъас, хъара хье джаллабурин джувабдарвелдихъас кIилди Российинра бицIи ватан иде Дагъусттандинра хабдин Iуьмурдихъас. Мубарак хьурай чвас ме центр къанунилди дахъуб», — пуне ахирахъди республикайин хIатти. Федор Щукина хъуттурфуне ме ягъа мисаъ дахъуна уй выставкабурихъра. МебуригI гIай уй «Без срока давности», «Освободители Европы» хара «Подвиг сквозь года» агъаттара.

Салихат Малагусейнова