Российин Ягъ — хIуькуматин хIаягъ э. Ме ягъ цIаевеларна духIубавелар, учин кIилдин тарих хъая Российин Федерацин ху ягъан, миллатарин садвелдин, чиппин ватан бадалди джемеIетин дамакъдин ишан э. ХIуькуматин ке зурба хIаягъарикес сад э. Ме ягъ бахш акьунафра уч — учин ахттигьар хьуна кIилдин, демократический хIуькумат арайил хьувелдис э.
ЦIае Россия арайил акьубан кьадам хьуне 1990-цIурпе исан 12-пе июнь, Российин Советская Федеративная Социалистическая республикайи (РСФСР) хIуькуматин суверенитетин деклорация кьабул акьуб.
ДехIела гьер иса хIаягъра къаршиламиш аркьа гьеме 12-пе июньди. Ме хIа ишанин вакъиа цIае Российин тарихин бина хьуне. 1990-цIурпе исан 12-пе июньди РСФСР-дин халкьдин депутатарин садпе Съездил лап тарихдин къанунин кIеджар кьабул акьуне — декларация о государственном суверенитете агъаттар. Ме къанунинилди Россия СССР-дигIас гIайчIуна, михъ учин Конституция, учин къанунар хьуне. Декларация кьабул акьухаб хIуькумати учин къанунарна, учин гьунарар арайилди аттивуне. Хабди са исалас, 1991-пе исан 12-пе июньди садпе сесер хьуне джемеIети президент гIаттивубан. СесеригI гъалиб хьуне Борис Ельцин. Ке удигьай ме ягъ деклараци кьабул акьуф пуна къаршиламиш аркьай уй, 1994-пе исалас Ельцина ме хIуькуматин ягъ суман акьуне. 1998-пе иса ттур духIуба акьуна ме хIаягъакес День России хьуне. 2002-пе исан 1-пе февральди РФ-дин цIае Трудовой кодекс кардик кихьуна ме ттура къанунилди тасттикь акьуне. 1992-пе исалас 2002-пе исан 12- пе июньдисттегьен ме ягъ деклараци кьабул акьу ягъ ий, джемеIетин арайиъ азадвелдин ягъ.
ХIекьданди миштти пас хьасев — хьастту суал э. Фас пучин. Декларацихъ хъуттурфучин Россия СССР-дигIас гIайчIуна адавуй. ХIаягъ къанунилди тасттикь акьуна ая, Российиъ къаршиламишра аркьа. Ме хIаягъ хъучадигуна хьин хье ватанил дамакъ аркьа, мин тарихдин рекъ кIвал аркьа, культурайин ирс, агалкьунар, багьа задар, халкь сад аркьа ирс афухIа. СССР-дигIас гIаттархьубахъай алакъа давайчира ме хIаягъ ишан э Российин хIуькуматвелдин, миллатарин надирвелдин, халкьарин ватанперасвелдин, джемеIетин садвелдин, ватан бадалди абада фикирдин. Миллатарин садвелдинра ватан бадалди аркьа дамакъин, гIедатарна ирс ухIубан ишанвелди День Российи — хIаягъан мегIна ппара багьа аркьа. Гьеме ягъа хIуькуматин джалла символар: пайдагъ, герб, гимн — кIилдибур сад хьуна кIвал аркьа халкьарис алттушу, гьалдин, хабдин тарих хIуькуматин.
Российин Федерацин флаг садпе ишан э хIаягъан. Джагвар, чуьлле, ире — рангар, гьер усариас аларгва: хIуькуматин идарабурил, яшамиш вере хуларил, машинарил, са чIалалди нандиъ кканчира. Ватандин тарихин ишан ишламиш аркьа хъара мегIракабуригI, ухьтан аркьа хIаягъан деликара: плакатар, открыткабур хъара джуре задара. Пас хьасе Российин ягъан са мегIракара кIили гъайдава хIуькуматин гимн хъудавай. Ме агвар акьа Ватандин гьававел, зурбавел, тарих, халкьарин садвел. Гимн аркьагуна ватандин тарихис хIуьлмат бадалди джемеIети мил лекул гъузуна йиркIв алихьа.
Ме ягъа Президенти Кремльдиъ хIуькуматин джавизар, премибур ирцIанде, джалла джуре хIа гьуларихъай учира мубаракара аркьа. ХIуькуматин гьер мурттариъ гимндин ун алдий гъадива ватандин пайдагъар. Российин шагьурарин площадарил дархъа лап хIа концертарин мегIракабур, агъарта салютар. Хъара ме ягъа аркьа гьер джурейин флешмобар, фестивалар, ватанперасвелдин акцибур, чишна э Георгиевский ленттабур пай акьуб.
Салихат Малагусейнова
