13 -пе майди Магомед Рамазанов тастикь акьуне Дагъусттандин Правительствойин Председательвелди. Ме ми кардил гъузар акьас майил акьуне республикайин парламентин депутатарира. Мегунасттегьен Магомед Рамазанов СКФО-йиъ РФ-дин Президентин полномочный преставительдин заместитель ий.
Ме кардихъас хабар йина уй 6- пе майди. РД-йин Правительствойин Председательдин врио Магомед Рамазанова, учин нубати чугъсагъулдин чIалар пуне РД-йин Народный Собранил Дагъусттандин хIаттин врио Федор Щукинас учил ме кар аманат акьубан. Заал аманат акьуная лап хIа кар Республикайин ватанагьлибурин джаллабурин удигь. Мебурин муш кея хIавелдин кар дузди садсуман кIили файшубак. Чин кIили файшуна кканне кардихъ хъуттурфанасе гьалдис бегьем акьуная курарихъ,таджрибайихъ, хъара Дагъусттандин мункинвеларихъна бегьемвеларихъ». Гьеме мегIракайил магомед Рамазанова кIвал акьуне ке ппара фикир йина ккане халкьарис майил акьубра.
«Ке хIа фикир ирцIанди ахьасе СВО-йин ишттаракчибурин хизанарис, хIа яшдин инсанарис, джандин сагъламвел адава сурхьум инсанарис, хъара Iуьмурдин читин хIелдиъ ая инсанарисра». Магомед Рамазанова пуне учин кардин рекъуьъ джемеIетин фикирдихъра уч хъучавесе пуна: «Зе нубати, зун ппара загьмат алихьасе, Правительсттвойи хъуьдуьхьуьна, зарбунди, ачухъди кар акьубал. Ме кардин рекъуьъ зас чишна хьасе республикайин ватанагьлибурин суаларис ирцIан джувабар, мебурин хIел аркьа читинвелар». Дагъусттандин Правительствойин Председательдин врио Магомед Рамазанова парламентин депутатарин удигь гъургъая вегIдайи гIачихьуне региондин социально — экономический аваданвелдин рекъра. Ме кардин фикира садпе мукьуйил алхьасе пуне.
«ХIуьлматлу депутатар! Хьин лап батIарди гъавурдиъ ая ягIа региондин социально — экономический аваданвелдин рекъуьн читинвеларин. Гьемиштти идегуна ппара лазим э ке удигьай джемеIетис гъам кея суалар хIел акьуб. Ме э рекъерин хIел, Iекварин кьадмивел, хьеттин мерттевел, духттурвелдин кумакин рехIетвел, махьтабар, шиниккварис садикар, хъара джуре социальный джигагьар, инфраструктурайин джигагьар арайил акьуб. Гьелбетта гьеме курарин суалар хIел акбуалди э джемеIети хьин акьу кардис кьиматра ирцIанф. Хьин, аваданвелдин тегIдевелра афухIуна кканде, аларгвай иджвелин духIубавелара акьуна кканде, ме духIубавелар дагъусттанагьлибурис чиппин гьер ягъан Iуьмурдин рекъуьъ аргвагъилди», — пуне Рамазанова. Рамазанован чIаларилди гьер курар арайил акьуб асуллу э хъай кар акьубалас республикайин Правительствойи, Народный Собрани, муниципалитетари, хъара хье хIуькуматин хIаттин Владимир Владимирович Путинан майилдиласра. Народный Собранин депутатарин удигь чIал йи усаъ Дагъусттандин Правительствойин Председательдин врио Магомед Рамазанова пуне — Правительствойи аркьа курарикес ке удигь ахьасе соцподдержка.
«Ке ппара фикир йисе СВОйин ишттаракчибурин хизанарис, яш хьу инсанарис, агъдарукьа ягъниш кея инсанарис, хъара читтинди ая инсанарисра»!, — «Вести Агула» газитин редактор Алена Магомедова.
