Федеральный центрди фидегьен кканчин, гьегидегьен кумак акьасе Дагъусттандис угъалари йи зарар гьаттивас. Гьеме кардихъас хабар акьуне Российин МЧС-дин хIаттин заместительди Алексей Кострубицкийди Сергей Меликов кIилиъ ай файшу оперштабдин заседанил.

Кострубицкийди йиркIурал акьуне Дагъусттандиди гьикуная пуна Донской спасательный центрдиас кумак 100 инсанра 30 техникара. Хъара рукьуна кканефе Тульский спасательный центрдиасра 100 инсанра 30 дегьен техникара. Министирдин заместительдин хIисабарилди угъаларин гьава сабицIи сакинди ая Дагъусттандиъ, алчаде кумакилди мебурис йиная зарар гьаттивас гьалдис мункинвел ая. Кострубицкийди арайил акьуне джурейи ул ачатуна ккане курар. Садпеф – хьудегьен дахи дахъуна кканде рекъер джалла читинди ая хIурариди, Iудпеф – хьетикес зарар давегъилди акьуна кканде. Якьу тонн гидрохлорид натрия файдиная Дагъусттандиди, хъара 10 тонн рекуьъ ая мич вей.

МЧС-дин хIаттин заместительди тIалаб акьуне идарабурин хIаттарикес хъара муниципалитетарин хIаттарикесра хьудегьен дахи инсанарис гьер са хабар рукьас акье пуна. Аркьа кардис идже кьимат йине заместительди МФЦ-йин идарайис, ме идарайин пешакурари Сергей Меликован буюрмишилди ягъра Iуьшра кар аркьая, хъара минтрудин бригадабурира гьер зарар йи хулади вей гIерзабур гъуршанди рехIет аркьая инсанарис ме кар. Джурейи фикир йина кканде са-са инсанарис, читтин хIелдиъ архьуттарис, мебур э мал-къара кIеттар. ЯгIар акьуна кканде сасра регионариъ фиштти кумак аркьайчин ме джуре инсанарис, хабди региональный кьадарилди кумак аркьагъилди мебурис.

«Атуна ккандава инсанар чаб чиппил алчархьу балайихъай, социальный кумакра адавай», — пуне Алексей Кострубицкийди.