10-пе марти Дагъусттандин Правительствойин Председатель Абдулмуслим Абдулмуслимова ишттарак акьуне гьеме университетин презентацигl.
Махачкалайиъ, къанунилди Северо-Кавказский университет дружбы народовдин презентация хьуне 10-пе марти Дагъусттандин Правительствойин Председатель Абдулмуслим Абдулмуслимова ишттарак акьуне Махачкалайиъ ая Северо-Кавказский университет дружбы народовдин къанунин презентацигI. Ме шадвелдин мегIрака хъучучIастти премьер-министр, ме идарайин, хъара михъай алакъа ая, Имам Шамилан ттуранихъ хъая Северо-Кавказский гуманитарно-многопрофильный колледждин гIилмин, ягIарвеларин кардин кьайдабурихъай таниш хьуне. ХIайи фикир йине мисариъ акьуна ккане гьалдин джурейин цIаевеларис. ВУЗ-дин экскурсия премьер-минитрдис кIили файшуне идарайин ректор Тавлу Казакбиева. ВУЗ-диъ ая гIуьфу факультет, гIуьфу кафедра, Международный институт Интегративной медициныра. Мисаъ ая хIа гIилмин рекъер: стоматология, фармация, клиническая психология, психология, хъара среднее профессиональное образованиера.
ЯгIайин ягъа Iари Iу факультетиъ 136 студенти очно хурая мисаъ. Абдулмуслим Абдулмуслимов таниш хьуне университетин цIае гIилмин программабурихъай, студентарин Iуьмурдихъай, аруцуне хурубарин лабораторибуриъ, кьиматра йине мисан хIелдис. ВУЗ-ди учира ппара фикир ирцIанде ватанперасвелдин тарбияйис. Премьер ачушу кабинетариъ ай уй информационный уголокар, мемориальный стендар Расул Гамзатовахъас, Магомедали Магомедовахъас, Нурмагомед Гаджимагомедовахъас, Альберт Батыргазиевахъас. Мебур кидавайра ВУЗ-диъ ая фармацевтический, химический лабораторибур. Студентарис практика хьас икьрарар хъитIуная къайилас вартт больницабурихъай Махачкалайиъна Каспийскдиъ. Ппара батIарди арайил алдея мисаъ стоматологический кабинет. Гьер са студентифас хьасе мисаъ учис ягIар акьу теория кардилди ахттармиш акьас. Абдулмуслим Абдулмуслимова хIа кьимат йине мебурин гьалдин мугьлатарисна шартIарис. «Мишттин кабинетар зурба пешакурар арайил акьубан рекъуьъ гьич дажиркIе савкьатар э. Мебури лап гьава ягIарвел йисе гьер са гIешкъ ая студентис, гьемиштти ме пешакурари хабди хье республикайин ттура гьава акьасе», — пуне Дагъусттандин премьер-министрди. Специальный анатомический кабинет агвар акьуне Правительствойин Председательдис стоматологический факультетин садпе курсуниъ ая студенткайи Патимат Махмудовайи. Премьер-министрди ире лента кьатI акьухаб, идарайин кьайдайис кьиматра йина конференц-залдиъ хIаягъан мегIрака хьуне. Студентари агвар акьуне чипин гьунарарин номерар, видеороликар, хуруне нашидар.
Хъара гъургъуне мисал РД-йин гIилминра наукайин министр Яхья Бучаев, РД-йин НС-дин комитетин председатель Ильяс Мамаев, БРИКС-дин Комитетин эксперт Геннадий Пановра. Университетин ректор Тавлу Казакбиева чугъсагъул пуне премьер-министрдис, ме вакъиа республикайин гIилмин система авадан акьубан рекъуьъ лап хIа кьадам э пуна кIвалра акьуна. Гьал студентар мич адесе Имам Шамилан ттуранихъди 2026-пе иса къанунилди цIайи дахъу университетиди суман. Ме кар хъара идже хьуне Российин Президент Владимир Путина садвелдис бахш акьу 2026-пе иса хьуна. «Ппара багьа э хье университетин бина дусттвелилдина садвелилди хъучучIуб. Республикайин хIа гьулар, халкьдихъди, шиниккварихъди багу хьуба час эхIттиб ирцIанде багайин ягъанисра. Че университетиъ ке идже мегIелимара ая, ке батIар студентара. Зун дамакъ аркьа ме кардил. Мисаъ хуру пешакурарис кардил гъузанасра са читинвелра хьасттава. Духттурвелдин рекъуьъ мебурис кIилди раккар дахъуна ахьасе», — пуне интервьюйиъ Тавлу Казакбиева. Ме мегIракайил гъургъай Геннадий Пановара хабар йине, ме ВУЗ-диъ арайил хьасе пуна Международный институт интегративной медициныра. МисагI гIахьасе йицIуд дегьен кафедрабур: кафедра китайской медицины, кафедра аюрведы, мануальная терапийин, гомеопатин хъара джуреттара. «Мисаъ арайил акьас фикирдиъ ая лап хIа проект. ГIахьасе йицIуд дегьен кафедрабур. Лап хIа чугъсагъул пас кканде зас, час гьемич унахъубан, хъара ме институт арайил акьас мугьлан йибан», — пуне республикайин вакиларис Геннадий Панова. Ахирахъди Абдулмуслим Абдулмуслимова учин хъугъуб хъая пуне ме гIилмин идарайикес лап гьунарлу пешакурар арайил аркьа мукь хьасе пуна, ме пешакурари республикайинра кIилди Российинра аваданвелдис ппара зурба майил йисе пуна.
Салихат Малагусейнова
