РФ-дин президенти, Елена Барбарайис Чугъсагъулдин кIедж йине. Дагъусттандиъ 8-пе Март багу хьу ягъа мубарак акьуне гъургъа гафар дала аркьа курар гьава иде дишагьлибурис.
МебуригI гIай уй Кизлярдиас иде Елена Барбарара. Дагъусттандин хIатти Сергей Меликова мис Владимир Путинан ттуранихъас Чугъсагъулдин кIедж йине. Ме джавизихъ лап хIайи руцIа Iуьрдун, хъара хIа кканхьунинра тарих хъая. КIиркI Еленайин, Российин армин офицер Виталий Барбара, игитвелилди кIине Донбассдиъ. Бабас валадин дард ме дуьньяйил але къакъарикес ке хIа, ке къекъе, гъадивас давере къакъ э. Амма Елена Степановнайи учик джикIине кьуватна йиркIуран цIуппевел, мегIна, ме Iуьмур давам акьас. Учин Iуьрдукес ме дишагьлийи кумакихъди аларуцуне ягIа передовойдиъ ая джуреттарис. Волонтерари мигелайра нубатин кумак завал аркьая эскерарис. «Шьем для наших. Кизляр» агъа движенин сайтуниас ишкилар, видеобур,стопкадрыбура завал аркьа. Учин кIиркIан фикир ухIай, майил ирцIанде ме, хье аме эскерарис, гьаме фикир йиркIураъ ай арайил акьунафе ме «Шьем для наших. Кизляр» агъай волонтерарин движенира. Михъди багу хьуне гьемишттин джуре дишагьлибура, кардис майил акьуне колледжарина шагьурарира. Командайи ппара зурбадалди кар аркьа: маскировочный сеткабур руха (гьалдис 1277-ридарихъ хъучархьуная 23 000 кв. метр алеттар), антитепловизионные, антидроновые пончобур аркьа, белье, йирхIунар хьуттарис больничный кунар дуьркьанде, гуманитарный кумакар завал аркьа. Хъара лазим иде рекъ хъая мебурихъ – Ростовдин госпитальдисра майил ирцIанде. Волонтерари вахтт гIартай гьика мич герек иде — даваф. Мебури гьику гьер са зад госпитальдиъ ая эскерарис ибгIа хулан двегIе – салам э. КIилди ме иджвелин курар хIа гьуларис дагуна амилгундава. Российин Президентин Чугъсагъулдин кIедж – мебурин загьмат агубан ишан э, хье зурба дишагьлибури гъалибвел бадалди аркьа кардис кьимат э. Амма Елена Степановнайихъ хъуттурфуна гъавурдиъ архьа, мис ке хIа джавиз грамотабурна кIеджар дава, фиштти хьунара авала учин кIиркI авуй усаъ агьал аяттарис кумакин мугьлат э. Хъара кIиркIан кар давам хьубан эхIттибра э. Салихат Малагусейнова
