Пешайи инсан дава ухьтан аркьаф инсанди пеша э. МегIелимдин пеша гIаттивагуна, хъара Iайи фикир акьуна кканде инсанди. Фас пичин шиниккварихъай кар акьас гьинавас кканчира вереф тава. Ме пешакардихъ хъай кканде мертте йиркIв, Iешкъ, кьастт, зурба сабур. Гьемишттин кIилин Iуьмурди шиникквар бахилди кар акьу мегIелимарикес сад э Мегьрибан Абдулаевна. 37 истти шиниккварис дарсар йина ая мегIелим э ме. Учи акьу джафайис мис йиная ттур “Почетный работник РФ” агъаф. Ме ттур гъушанастти чIукь ккейшуна адава, агъулари агъа суман, мугIариккес хьеттар. Ме, уч махьтабикк ккими димари, кIилиъ икIуна аяфи: «ХIа хьегуна закес, зе садпе мегIелим Зубайдат Ахмедовна суман, шиниккварис дарсар ки лан мегIелим хьасе», пуна.
Учин кьастт кIили гъас 1981-пе иса, махьтаб ккиркIугъилди , учIуне ме Дагъусттандин мегIелимар хIезур аркьа институтдин филологический факультетдиъ. 1986-пе иса, мевус ккиркIуна адегуна, мис учи хуру махьтабиъ кар акьас мукь джикIиндава. Мисаъ мегIелимар ппара уйи. Амма, хаб дачукIуна, учис ях певусаъди ушуне ме. 1986-пе исан1-пе сентябрьди Мегьрибан Абдуллаевна ушуне гьеме иса дархъай аме Арсугъарин муя исан махьтабиди (мегунас мисаъ ай уйиф якьу исан махьтаб и). 
РехIьят давуйи мис мич вес: е рекъуькк ккидававус, е вес машинар адававус, е чIал дагIай: мебурин чIал агъуларинф ичира джуьреф э — кьушанарин диалекттинф. Мич адине пуна пушмал хьундава Мегьрибан- мисаъ ая халкьари чиппин руш суман кьабул акьуне. Ки башттан, четивелар хьуни, амма мисаъ ай уйи, Типпигъаъас мич шувас ушуна ая, ХIелиматччичай. Учин хулаъ атуне ми ме. Яшамиш вей мисаъ хьеф иджи и. Мифас уч гъавурдиъ адархье гаф хабар гъушанас вейи-шиникквар бицIи аметтар идегуна, Iуьрус чIалан гъавурдиъ ихьас, агъул чIалалди тарджума акьуна ккан вейи. Учис Арсугъарин чIал дагIай, Типпигъарин чIалалди гъавудиъ ихьагуна, шиникквар элхъенди-чаб мин гъавурдиъ адархьай. Миштти идегу на, Мегьрибана учис Арсугъарин чIал ягIар акьуне. Мегьрибанас шиникквар кканди, шиниккварис мера. Мебурис Iуьрус чIал ягIархьас ми гьер джуьрейин мегIракабур аркьайи мебурихъай: КВНар, литературный вечерар. Iу иса кар акьуна,1988-пе иса, рекъ багухьас пуна, адине Мегьрибан Абдуллаевна ЯрIугIди. Мисаъра са иса кар акьуне. Амма ацIун гагьди кар акьуттисттегьен иджеттарди йиркIвурал алме мин мебур: шиникквара халкьара. 1989-пе исан 1-пе сентябрьди ушуне Мегьрибан Абдуллаевна мегелай Гъудагъди: мич ях пуна минат акьуне мис райондин хIаттари, мисаъ Iуьрус чIалан дарсар килан мегIелим адавуйихIела. Учин кар кканевелди, ваъ дапуна, ушуни ме мич. Iу иса мисаъра кар акьуне. ХIуриъ хьурай пуна, Iуд бицIи шиникквар гъилив фай. хIурариди вес четин идехIела, адине Типпигъарин садикдиди воспитательницавелди. Къабахъ иса мис хаб сасра хIуриъди, мегелай Гъваъ мегIелим лазимди ая пуна, мич ях пуне мис. 1991-пе исан 26-пе августи ушуне Гъваъди.
Мисаъ амилгуне Мегьрибан Абдуллаевна 1999-пе исан 26-пе августисттегьен. Муя истти гьер ягъа: машин ая, адава дагъай, рагъ ая, угъал-ибхь угъая дагъай, ушуни ме мич. Типпигъарин махьтабиди ме адеф 1999-пе исан августин вазала э: саIу сеIэт дарсара ес, пионервожатыйвелдира. Учи нандиъ кар аркьай уйичира аркьа мегIракабура аркьай аме ме.
Ме кардихъас мис «Почетная Грамота» йина ая: Дагъусттадин министр народного образования А.П.Гасанован ттуранихъас, Агъул райондин глава Ю.Г.Исмаилован ттуранихъас, уч кар аркьая директор К.М.Гаджимагомдован ттуранихъас, хъара сасрабура. 2006-пе исан 1- пе апрельдихъас мич, ягIара завучвелдира кар аркьай, дарсара киланди аме Мегьрибан Абдулаевна. Нандиъ кар аркьай хьичира михъас идже чIал дала агъайдава инсанари михъас. Учин кардик багьана кикIагъилди мусра экьуфттава ме. Джандин сагъвел, йиркIвуран рехIятвел, дуьйиъ ислехIвел кам дахьрай гьалдин хабра, чIал гьучавей, джаллайин нуьхIьбат- хIуьлмат ай кар акьас.
Тамам Рамазанова
