Хьуне агъа хьундава агъа мус ичинара са ЦинкIи - микIил джакьвамай. 

Ягъарикес са ягъа агъатIуне мин лекуъ меркIв. 

Фидегьен алучIучира хьундава мифас меркIв аттивас. Алттушуне ме кумак ккандий булбулилди, амма мифасра хьундава меркIв аттивас. Алттушуне ме чубарукилди, мифасра хьундава меркIв аттивас. Са дуч кIурара фай алттушуне хIурин джакьв къари хIабабалди: -Зе руьхI, зе йиркIв хIабаб, ма вас са дуч кIурара аттив зе лекуас меркIв, пуне ме. Къари хIабаба меркIв аттивуна кIурарихъай хьураккди ккичихьуна хъучучIуне гуни уджас. Са арайилас кIурара угуна ккиркIуне, ери гунира уджуне. 

Мегунас хаб адине хIурин джакьв Iешалин джугIра фай. 

- ЙиркIв але хIабаб зе меркIв хаб нан цIа агъай. 

- Я джан джакьв мекIв угуна ккиркIуне! - пуне хIабаба. 

Е зе меркIв нан, е дахьучин зас бахттабур нан агъай Iешай рахвай алттархьундава ме. Ахира чара хьундава хIабабас, йине джакьвалас учин бахттабур. Фай гунира алттушуна ушуне джакьв. Агуне мис хIуьппехъенари хIуппар узай гунира хъудавай некк ухай. Мебур гIегвал хьуна йина мебурис учин бахттабура экьуне учра гIуьтIанас. Завулас лиъ алттвей агуна джинуьхьуне ме. Хаб айчIвагунас хIуьппехъенари бахттабура неккраккиркIуне. Хаб хъучучIуне Iешай гъургъай: - Е зе гуни нан, е дахьучин зас хIуппар нан агъай. Чара хьундава хIуьппехъенарис, йине хIуппар. Фай хIуппара ушуне джакьв. Агуне мис са хIуриъ гьуркIу Iелефра адавай гIеджиз хизандин цIакIин, гIачадине ме маджлисигIди ери хIубра фай. ЦIакIинин эессибури мив фая хIа савкьатар агуф багьа гIалашувас кавха макьам йирхIуне. ХIурин джакьв сусахъай са хъарсра гъагьихьуна усттулихъ экьуне. ХIуппар руккуна батIар къавурмабура файдине устулилди. Гьеме вегIдайи хабра завул лиъ бадил хьуне. Джакьвалас хабра джинуьхьас алчархьуне. Хубджи гагьунилас лиъ гулуф джакьв айчIуне. Мегунас макьамара ккиркIуне, гIулара далгъуне, усттулара Iар хьуне.

Хабра хъучучIуне джакьв учин гIедат идегъилди: - Е зе хIуппар нан, Е дахьучин зас сус нан агъай Iешай. 

Чара хьундава касиб наврузбегдис, хIуппар хъудавахIела, йис алчархьуне сус. 

Фай сусра хаб учIуне джакьв рекъуьъ. Гьучархьуне мис рекъуьъ са тар фая кIиркI. Ппара ширин ун аркьай уй ме. Макьам кьабул хьуна див хьин духIуба акьас, вас сус хьурай зас тар пуне джакьвала джигьилис. 

Джигьил кIиркI гьелбетта дембедан рази хьуне, духIуб акьуна сусна тара ушуне гьерф учин рекъди. Алттушуне джакьв тара атай. Са арайи экьуна кIуранин кулдул хъучучIуне мегIни акьас: 

Са меркIв йина гуни гъушуф. ЦинкIи - микIил джакьвамай! Гуни йина хIуппар гъушуф. ЦинкIи - микIил джакьвамай! ХIуппар йина сус гъушуф. ЦинкIи - микIил джакьвамай! Сус йина са тар гъушуф. ЦинкIи - микIил джакьвамай! Гьаме арайи нандиас адифчира дагIай хаб бадил хьуне лиъ. ГучI хьуна ккедишиф фаттархьуна аргIуне джакьвалан тар. Iешуне джакьв, Iешуне амма багварив фушра джикIиндава тахсир кикIуна духIуба акьас. Гьалра алттвей аме хIурин джакьв, бурджлуйихъас руцай, ЦинкIи - микIил джакьвамай - агъай мегIнира аркьай.

Салихат Малагусейнова