Дагъусттандин, А.Тахо-Годин ттуранихъ хъая национальный музейдиъ дахъуная бицIи шиниккварик кея пешабур авадан аркьа "Устар" агъа культурно-просветительский центр.

Ме цIае джигагь арайил акьунаф "Семья" агъа нацпроектилди э, хIуькуматин министерство культурайин кумакра хъай.  Мисаъ шиниккваривас Дагъусттандин гIедатарихъас Iари гIилми гъушанас дава веяф, мисаъ чиппин гъиларилди ачмиш акьасра хьасе. Центр дахъуб бадала мич завал хьуттарис мубарак акьас адина уйи Дагъусттандин культурайин министрдин врио Зарема Бутаева.                  "Час кканде гьемисаъ гьер са шиникквдис ягIар хьуна: культура музейдин витринайил але варха шейъ даваф, ме э чве гъиларилди аркьа кеспибур хабди сасрабурисра ягIар аркьаттар. Чунра вей аркьай акье, чве дустара гъай акье, алучIай акье фичира акьас, хъугъай акье чвек кея пешабурихъ. Мункине чун гьемисаас хъучучIухаб хIа усттабур хьуна весе джалла дуяйиъ ттур аяттар хьуна. Чун акьу шейэр илгванасе Дагъусттандин тарихдиъ, хъара ухьтан акьасе хье Национальный музейдин коллекцира", - пуне шиниккварис Зарема Бутаевайи.  Национальный музейдин генеральный директор Пахрудин Магомедова хабар акьуне, ме "Устар" агъа центрдин кар хъукъуна ахьасе музейдин кардихъай. Ме центрдиъ агвар аркьай ахьасе мастер-классар, кIуранилдина хаятIилди накьиш алихьагъилди, ишкилар йирхIагъилди, дикьуб, кьвадилкьванар рухуб, хьеярикес гьер джуре шейэр акьуб. Мисаъ ая гьалдин мультимедийный оборудованибура.  Интерактивный форматилди шиниккварис мугьлат хьасе  чиппин ху ватандин тарих ягIар акьас, Дагъусттандин халкьарин культурайихъай таниш хьас, гIедатин гъилин курар ягIар акьас. "Устар", хьасе авалдин тарихна гьалдин фикир гьучархьа мукь. ГIедатарин давамлу авереф цIае несиларин гъилариъ э.     Батитай Габибулаева