22-пе сентябрьди Дагъусттандин хIаттин врио Федор Щукин ушуне Дагестанский государственный технический университетиди. Мисаъ ме шадвелдин мегIракайигI ишттарак акьуне, Военный учебный центрдин садпе выпускникарис военный билетара йине.

Ме учебный центр 2024-пе иса ДГТУ-йин базайил дахъуна, хье региондис лап надир майдан хьуне очно хура студентарис чиппин хIа пешайихъай военная подготовкайин ягIарвел гъуршан мугьлатра э. Мисаъ курсантарис лазим идедегьен инфраструктура арайил акьуная: специализированный классар, утвердит акьу штат, сур аудиторибурис Российин Игитарин ттурара йиная. Проект арайил аркьаф Российин Миноборонайинра Минобрнаукайин майилдилди э.

Зурба таджриба хъая инструкторар кIилил алдий студентарис яракь ишламиш акьас, дженгерин кьайдабур, гьалдин цIае лазертаг-оборудование ишламиш акьуб, БПЛА-йин пилотирование ягIарве. Огневойна тактический хIезурвелар кидавай курсантар ватанперасвелдин кураригIра гIаве, региондин акцибуригIра ишттарак аркьа, СВО-йин ветеранарихъай, игитарин хизанарихъайра гьучархьа. Вуздиди адибан рамкабуриъ ай республикайин хIатти ахттармиш акьуне центрдин джигагьар, ДГТУ-йин выставка, ВЦУ-йин классарна учебно-материальная базара. Мисал гIуларис агвар акьуне тактическая медицинайихъди хIезур аркьа класс, учебный стрелковый электронный тренажер, яракь афухIа кабинет, связин подготовкайин класс, компьюторныйна БПЛА-йин операторар хIезур аркьа классара. Агалкьунарилди хуруб ккиркIу садпе курсантарис Дагъусттандин хIаттин вриойи шадвелилди военный билетар йине. «ЯгIа хьин джаллабур шегьидар э кикиндира хье республикайис лап лазим иде вакъиайин. ХIулматлу выпускникар! Чве гъиларив ягIа Iари гражданский пешабур дава фаяф, военная специальностьра фая. Михъай – хIезур ягIарвел, читин вегIдайин суалар хIел акьуб, джувабдарвел кIили гъушуб, руьхIдинра джандин цIуппевелра хъая. Ме центрдин хурубари дисциплинайин тарбияра ирцIанде, джувабдарвелна вафалувел фай ватан ухIубан хIезурвелра ирцIанде. Чвакес, мус хьучира лайикьлувел хъай чве ягIарвел ишламиш аркьай, зурбадалди пешакарвел агвар аркьай, нае вегIдайи кканчира эхIттиб хъихьас вере, инсанвел кея зурба кьехIелар хьурай. Чвахъ хIа агалкьунарна къуллайвел хьурай, хье Дагъусттандинра Российинра аваданвелна иджвел бадалди лиханас», - пуне выпускникарис Федор Щукина. Федор Щукина чугъсагъул пуне центрдин мегIелимарисна насихIетчибурис. МебуригI гIая СВО-йин ишттаракчибура. Республикайин хIаттин чIаларилди, мебурин пешакарвелна дегIвийин таджриба хъара ппара лазим э хабдин ватан ухIа эскерар вардиш акьуна хIезур акьубан рекъуьъ. КIилдин чугъсагъулар пуне региондин хIаттин вриойи вуздин хIа гьуларис военный учебный центрдин аваданвелна арайил хьуб бадалди ацIуна загьмат диваттарис. «Зе хъугъуб хъая, мисаъ ягIарвел гъушанасе Дагъусттандин сакинвел ухIас хIезур иде цIае студентарин несиларира», - хъара хъучихьуне Федор Щукина. ДГТУ-йин военный учебный центр – ме вуздин структурное подразделение э, мисаъ очно хура студентарис мугьлат хьасе чиппин садпе пешайихъай барамбарди мисаъра хурай военная учетная специальностьра гъушас, мебур армидира гъасттава. Хуруб хьасе мисаъ Iу рекъуьас: командир отделения «Пулемётные»(Iу ис), «Старший стрелок» (исна сур). Хурубарин сборар ве ВМФ России Каспийский флотилин базайил. Аттестация акьухаб курсантар гьикасе садпе воинское званиера йина запасиди. Iешкъ аяттарифас контракт хъитIуна давам акьас хьасе кар пешакурарихъай. Хурубар акьас хьасе кканеттарифас. Студентар хьасе конкурсдилди гIаттивуттарикес.

Салихат Малагусейнова