Правительствойин Председательди уч адина ахттармиш акьуне хIа угъалар угъуна чIирхьу рекъер, мугIар батIар акьубан курарин фиштти арайил вейчугас. Рекъерин читинвелар кидавай Iеквара хъаттархьуная ппара мукьариъ. 23 хIуриди рекъер гулуне, Iеквар адай 20 хIур аме. Рутуларин хIуриъ са километр нецIун гIуьчIаларихъ хъая рекъ файшуная. Ме кардихъас хьеттикес хатIа хьеб мумкин э багулив фая 15 хуларас, са духттурханайис,Iекварин цIагъунарис. ХIуригI гIая рекъера чIирди ая. Агъул райондин Чирагчай нецIун хьед вартт хьуна са хьимуд мугIар, рекъерин багвар ккедихьуная: Магьу — дерейиъ, Дулдугъарин, Чlаарин хIурариъ. Рекьер кьатI акьуная якьу хIуриди. Уч адибан рамкабуриъ ай премьер-министрди хъуттурфуне са джалга социальный объектарихъра. Агъул райондиъ батIар аркьай кардик кея Типигъаринра Чlаарин арайиъ ая мугI «Мамраш — Ташкапур — Араканский мост» агъа рекъун кьурц. Абдулмуслим Абдулмуслимов аларуцуне ме мукьарил Агъул райондин хIаф Закир Каидовра «Дагавтодордин» пешакурара хъай. Улакьин рекъер адай аме Рича, Бедюк, Чираг. Чирагъ-Чай нецIулас леку руцай алттвере мугI акьуная ме хIурарин джемеIетис. Закир Каидова хабар акьугъилди райондин вакидари мебурис лазим иде шейэрна натиджабур хъучатуб арайил акьуна ая. Са чIалалди Абдулмуслимов джалла четин иде усарил аларуцуна ахттармиш акьуне. Дулдугъди гIачавере мугI файшуна ме хIуридира улакьин рекъ хъикIуная, инсанар алттвес кlуранин мугI акьуная мичра. Гьелбетта ме четинвелар гьадихьуб бадалди кар аркьая джаллабури. Амма кар четин э мебур дуз акьас, тIабиIетин гьавабури мугьлат даирцIан хIела. Миштти ичира йиркIураъ ая ниятарилди 15пе августтис арайил акьасе ме рекъер. Вахттунин рекъ арайил акьасе 10пе августтарис. Абдулмуслим Абдулмуслимова хабар акьугъилди ягIайин ягъа агьуларин рекъер батIар аркьай кардик кея гIуьфуд тракторар, 20 реъерин пешакурар.

Салихат Малагусейнова