Исарихъ исар вей, магьа ттиъ 78 исра хьуне хье хlададари, хlабабари ке багьа кьимат йина — чиппин lуьммурар — ме дуньяйил хьасмидеттарис lекве дунья агубан бадалди. 1941-пе исан июньдин вазалан 22-пе ягъа, хье Советский Союз агъа азман хlуькуматил хIа бала алчархьуне — хабарсузди Iекв вере арайи хьеал душманди хIуьджум (нападение) акьуне. Фашистарин Германия агъа хlуькуматихъай маслихlет акьуна айчира, lуьшан багамис фиттикесра хабардавай гъархьу инсанарил цIа угъуне. Душман дегlви аркьай адегуна, гьерттил але фарз ве дегlвиди айчlвас, агъдарукьа халкь — Iусеттар, хумбар, шиникквар — ухlас, хулар, мукьар сагъди амилгванас. Гиштти акьуне те авалдин вахттуни, хlуькуматин хlаттари буюрмиш акьуна гъайшине Советский Союздин хlа зурба халкь. Са хlур, са тухум, са хал хьундава дегlвин ибцlел кидиркьуф. Сурин хулариъ lари lусеттарна, хумбарна бицlи шиникквар дала амидилгуна, джалла идемар ушуне душмандихъай укъас. Ппара хумбара уйи дегlвиъ аяттарис кумакар аркьай: иттаттарихъ, йирхIунар хьуттарихъ ахъаджихlай, окопабур рукlай, хъара сасра курар аркьай. Яку истти гаш-мекl дагъай, lурд-гlул дагъай вей хьуне хье дадарин дегlви, кьастт акьуна — зун кlинара душман ачатасттава агъай.
Фидегьен гашарна мекlер хьуне, фидегьен зулумар хьуне, фидегьен тахсир кидава инсанар кlине. 1945-пе иса 9-пе ягъа майдин вазала дегlви ккиркlуна, душман ккедикуна, хье халкьди гъалибвел гъушуна душмандин варттал, садпе ислехI ягъ хьуне. Ме ягъа Красный площадьдил кlилди дуньяйис аргвай акьуне Гъалибвелдин хIаягъ. Те ягъанинхаб ацlуна хlуькуматари хье хlуькуматра гlай 9-пе майди хlаягъ аркьа. Джалла шагьурариъ, хlурариъ парадар аркьа, игитарихъас шаирар хура, хlададарин ишкилара фацуна, хъадаваттари ттурар ликlина кlеджар фаве гъиларив. Ме иса дуньяйин четин гьавайихъ хъуттурфуна «Бессмертный полк» агъа мегIрака аркьай адава, амма интернетиъ ме мегIрака хьасе. Хьевас акьас вей ая кар — гъалибвел хум гьадатуна, хьехъас джанар алихьуттарин джафа гlачадатуна, чиппин Iуьмурар йина хьес гъалибвел гъушу инсанар батIар чIаларилди йиркIурал акьуна, гебурис дуьгIе хуруб. Хьин дегlвибуригьас варха хьурай, те вахттарин четинвелар, гlезабар эмкlерикесра дагурай, дегlви хьегьас варха акьуттар хум гьадатуна!
