Гьер иса хье хIуькумати 23-пе февральди ташкил аркьа идемарин хIаягъ. Ме ягъа хьин табрик аркьа джалла идемар. ХIа пай ме ягъа хьин батIар чIалар, савкьатар бахш аркьа аскерарис, дегIвибуриас рукьуна идемарис. Амма фикир акьучин, ме ягъ Iари идемаринф хIисаб акьуб дуздава, чIукь дишагьлибур адава, идемарихъай барамбарди дегIвибуриас джавизар фай адеттар, къушумариъ курар аркьаттар. Миштти идегуна, хубджи дишагьлибуривасра пас хьасе ме хIаягъ чиппинфра э пуна.
Ме хье гьалдин заманайин календарьдик бадил хьуна Iайи ппара гагь дава.
Авала ме ягъас День Красной Армии агъафи, хабди 15-пе апрельди 2006-пе иса ме ягъакес хьуне День Защитников Отечества. Ме исалас хIуькумати адихьуная къанун курарил алди ая инсанарис хулариъ экьвас мухьлатар ирцIангъилди.
Ме ягъ хъучадегуна, ме аскер э, ме дава пуна сайира фикир аркьайдава, ке удигьай чиппин хулариъ ая дадарис, чуппарис, кIиркIарис мубарак аркьа хIаягъ. Амма, ке удигьай мубарак акьуна кканде зурба кьехIелар ухIуна, хIа акьу дадар-бабарис. Фас пучин, хIа идеминра бицIи кIиркIанра гIунарикъ бабан загьматар э хъавереф. Гьер шиникквдин агалкьунар, гьунарар даданра бабан загьматилас асулу вереф.
Хье Дагъусттандиъра ис исалас ппара хизанари аркьая идемарин хIаягъ. Iайи батIар чIаларилди мубарак аркьа бабари чиппин илле валадар. Гъурбатиъ, къушумариъ аяхаб, аркьа дуьгIебур, чиппин шиникквар сагъ-саламатдалди адирай агъай. Бабарис багьа э кIиркIар, фи кардис хьучира чиппин даягъ, найе мегIракайил кканчира чиппин вакилар идегуна.
Дадарин гъургъуб къалинди давайчира, йиркIв хъара Iайи багу э кIиркIарихъди. КIиркI хугуна, ппара хIа суфрабур ачухъ аркьа Iуьччубарис. Фикир акьучин, дадарин васиятар кIилиъ гъареф, гебурин ттур гъадиваф, ирс гъареф хIа пай кIиркIари э.
КIиркIарихъас гъургъучин, чиппин багухъасра ппара нуьхIуьбат, хIуьлмат аве чиппис Iуьмур йина, ухIуна хIа акьу дадасна бабас. Мусульманарин джемеIетин арайиъ ке багьаттар дадна баб э. Авалдин гIедатилди, дадан удигь кIиркIарис, хIа чуппарин удигь бицIи чуппарис экьуб, ахъухьуб, хIа идемарин ахттилат кьатI акьуна гъачучIуб лап хIа Iейиб кар и.
Джуре миллатарихъ хъуттурфугуна, хье мусульманарин халкьдин арайиъ гьалра аме хIуьлматлувел. Гьер даданра бабанра вазифа э чиппин шиниккв хугуналас мич хIуьлмат ухIубахъди вардиш акьуб. Гьерттин фикирдиъ аве, багагь валад хIа хьугуна мин гIунарил алчархьасе пуна учин хизанара, хIуькуматин сакинвелра. Са ягъ-Iуьш аде вахттуни, ке удигьай зурбадалди гъурзанф идемар э. ДехIела 18 ис хьухаб хурубарик кидава илле джигьилар гъа къушумди. Мисаъ мебурис ягIар аркьа яракьихъайра кар акьас, четин курар алчархьу вахттуни кIил ухIас. Мебур ягIай идже э, амма ме даягъар ишламиш аркьа ягъар алчадархьурай сайилра.
Луиза Гусукаева
