ЯгIа, 23-пе августи, хье хIуькуматиъ Курскдиъ дженг дивувусаъ Гъалибвел гъушубан муйцIур ис хьуная. Ме дженг вей хьуне 50 ягъна Iуьш. Башламиш акьуне1943 иса 5-пе июльдихаб 23-пе августисттегьен. 5-пе июльди немцарин душманар алгъазиянас хъучучIуне Орловский-Курский дугайил. Хабди хье Красный армин къушумира хъучучIуне хаб атай оборона ухIай. Джалла кей ме дегIвигI иштараквел аркьай хьуне 4 миллион инсан. Курскдиъ дженг дивуб хьуне ке хIаф тарихиъ ке ппара танкар иштараквел акьу дегIви э пуна. СССдин багухъас ахьуне 5 агъзур танк. Iари танкарилди давуйи Красный армин хIа гаф акьас вей уйиф, мебур кидавай, ме къшумихъ душманарилас вартт самолетара ппара хъуйи, пушкабура, хъара Iудтти ппара аскерара уйи.
Курский областин джиларил ке хIа ачукъубар хьуне душманаринра Красный армин Молотычи — Ольховатка – Поныри агъа хIураригь. Хубджи ягъари сад сайис гъам алгъихьай хьуне мебур. Ахирахъди хье къушумар хаб дачукьай, алзийине немцарил. Гьемегуна мебурин гуджар вартт хьуна, мебури азад акьуне Орелна Белгород агъа шагьурар. ДегIвин ахиран ягъ хьуне 23-пе август. Ме ягъ хьуне Курский битва кIиркIу ягъ.
Хье хIуькуматин аскерари агвар акьуне чиппин зурбавелна джаллайин игитвел. Ме дегIвиъ иштараквел акьуттарис Iу вершна хьибцIур инсандис йине звание Герой Советского Союза агъаф, верш агъзур аскерарисна офицерарис йине орденарна медалар. 23-пе август хьуне хье хIуькуматин День воинской славы агъа ягъ.
«Агъуларин хабарар» агъа газитин пешакурари мубарак аркьая ватанлубурис гьеме кьимат ая хIа кар бадала.

Батитай Габибулаева