Накь, 26 сентябрьдиъ, Махачкала шагьурдиъ ппара хIа зурба маджлис хьуне агъуларин халкьдин. Маджлис арайил акьуна уйи ГIиса гI.с.ттур але Духовный центрдиъ. Мисаъ завал хьуна уйи якьу агъзурдегьен инсан агъуларикес: хIаф, бицIиф, джигьил, Iусеф, идеми, хумбеф дагъай Москвайиас, Ставропольский крайдиас, Дагъусттандин гьер шагьурариас, районариас (Агъул райондиасра) хъара сасра мукьариасра кей джемеIет.
Адина уйи хIурарин имамар, хIуькуматин курарил але инсанар, хIекимар, ариш-варишчибур хъара ппара сасрабура.
Ме маджлис гъай ая арайил дахьуна мазгитаъди ачавестти гьерттис ирцIанди номерар кея кIеджар, хабди савкьатар ирцIангъилди. ХIел-хIел аркьай айчIвай сегьнайилди нашидар ахъихьай Нашидуль Ислам агъа шакъа уйи.
Башламиш акьугунахъас ккиркIвасттегьен маджлисин кIил файшуне Магомедрасул Абакарова, Iуьрус чIалалди. Хуруна кьуръан дахъуне маджлис.
Маджлисил хIа къазанариъ акьуна уйи бурунзин аш, ухас уйи хьеттар, чай. Мисаъ аядегьен хумбарис йине са-са къизилгуьл.
Ке удигьай, башламиш акьухаб маджлис, чIал йине Агъул райондин хIаттис Закир Каидовас. Ги учин багухъас мубарак акьуне джалла адидегьенттарис мегIрака.
«Ассаламу алейкум, агъуларин джемеIет! Мубарак хьурай чвас ме маджлис! Савабар ликIирай маджлис арайил акьуттарис! Ппара шад э зун, мидегьен халкь агвас завал хьуна са усаъ, хье агъулар. Мишттин маджлисар хьехъас кам дакьурай! Хье хулариас саламатвел, сабур, сакинвел кам дакьурай. Джандин сагъвел хьурай джаллабурис. Хье кIиная хIададар-хIабабарин гунагьарин гIефу акьурай! Мишттин маджлисар аркьай кканде хье райондиъ, ватанагьлибур завал акьуна, ая иджвеларихъас, Iайвеларихъас хьин акьуна ахттилатара хье ватандис иджвел акьас алучIас. Хъара шагьурариъ дуламиш вей аяттарикес, хье чIал, дин-тIеIет, гIедат кIвалас гьадатуб. Вахтт ккеттвей вахттуниъ хье ватандиъди вей акье. ДуьгIе кам дакьурай хьехъас! Иджвелар ппара хьурай!», — пуне Закир Каидова.
Хъара мисаъ гъургъуне удигьай райондин хавел аркьай хьуттара, хIа идемара. Сегьнайилас акьуне агъул чIалан шаирара, имамари ахъакьуне хутбабура, аттфайдине агъуларин зурба спортсменара.
Хабди ачаверегуна фачийи номерарилди аттивай арайил акьуне савкьатарин эессибур.
Ахирахъди ме аркьай ая мазгитас кумак акье пуна тIалаб акьуне маджлис гьай аятти са манатилди хьунара. Далгъуне маджлисилас хъай ишкилара йирхIуна.
Камиль Мирзоев
