Вакцина акьуна архайинди хьуне

Коронавирус итталин ахттилатар ирхе вея. Ке цIайи ме иттал Iайи куьркьуне хIа инсанарис, ме нубатиъ, хаб ади иттал Iайи куьркьуне джигьиларис. Удигьай вакцинаци даркьай гъузуне джигьилар, хабди ме итталик кеяф агуна чара хьундава дирхIас. Сад ме руб ийрхIуттарикес э Агъул райондин, Типпигъарин хIурин джигьил шиниккв Рамазан.

«Ме руб йирхIас пуна, ппара вахтт и зун фикирар аркьай. Гьинара зас гуджра акьундава. Зас учис димари кканди уйи, са кардинра къадагъа адавай дуламиш хьас: спортзалиъди вес, зе дусттарихъай гьучархьас. Дахьучин ягъди учIун хулаъ найчра адучIай, бабар-дадаригьдира гьучадавей илгуне зун бицIи суман ме иттал зас куьркьугун. Бабар- дадарихъас хъара гъам кей уйи зас, фас пучин хIа инсанар э, пас верефттава, кедишасттава пуна. Са муз сагъ хьуна вахтт гIайшухаб йирхIуне зун «Спутник V» агъа вакцина.  Зе бахттунис тегуна Iайи иттал алгъазийинра адавуйи заал, амма хабра иттархьасттава пуна сайинра эхIтибара адавуйи. ИдехIела и зун ме руб йирхIуфра.  Руб йирхIухаб гьава са бицIи суман духIуба хьуне зе. Джан буш хьуна, кIил аларуцIай хьуне зун. Амма е руб йирхIайра хабар хьундава, хабдира Iуьр акьундава, е температура гъайшиндава. Са-Iу ягъарилас зе бабана дадара акьуне ме вакцина. Зе фикирарилди, иттархьуна вазардалди джан арайил акьас давей эркьвай далара, вакцина акьучин иджи э.

Агьал зун ппара тIалаб аркьа зе дусттарисра, багунттарис ме руб йирхI пуна. Амма зе дусттари агъа: «Чин са-Iу вазари гъузанасе, ме руб йирхIуттарис фера аркьайчугасттегьен, хабди чинра йирхIасе» (Элхъуьне).

Са-садарин фикир магьмиштти э магьа. Гьертти учи фикир акьурай чиппис фи иджи ичин. Амма зун вакцина акьухаб архайин хьуне»,- пуне Рамазана.

Батитай Габибулаева

Добавить комментарий

Ваш адрес email не будет опубликован. Обязательные поля помечены *