Хье райондиъ, шагьурариъ ибгIавел хъучадиф башламиш аркьа цIакIинар. Сае вахттарира аве гебур, амма гIулин ахиран вазари хут гъуланде.
ЦIакIинар шадвел э, хье уларигь цIае хизан ве. Руш гьикайчира шувас, е шиникквдис сус аркьайчира, ме дуьйил хьехъ хъуе шадвеларикес э гебур. ЦIакIинра гамачI хъай вереттаре агъа хье мисалабури.
Гьалдин вахттари те вахттарихъ хъуттурфуна ппара духIуба хьуна ая цIакIинин гьава. Рушан цIакIин тегуна къваркъвара файшуна, Iу манатра кичикIуна, Iелеф IуьтIуна, ухаф ухуна шейъра ахъатуна рекъуьл акьуна кIиркIвайи. ХIа цIакIин суманраке вейдавуйи, гьал кIиркIанттивас фадикIуна ая харджарилди.
КIиркIан цIакIини, тухум гъареф идегуна, ппара шадвел гъа. Рушан Iари къатир аркьа, са цIакIин ве. Наврузбегдин ягъуйра, Iуьшуйра ве демар.
ЦIакIинихъас гъургъуне хьин, гьал пас кканди ая цIакIинихъди вереттарихъас. Зун удигьай пеф суман, цIакIин аркьагуна, ягъар ккими унархъа ме фулан ягъа че маджлис ая пуна, кIеджик ликIина ягъра сеIет гьикуна аве ве хулади.
Хье гIедат бадалди вас ге кардихъас хабар ве инсан цIакIинигIдира адина уйиф, чара вейдава душуна. Аве вун ун дахъун вас шаб агъаф учи аркьай ая маджлисиди. Ле кардиъ фи аркьай ичи суал э. Ме вахттуни гьинан хулаъ хъуттурфучи Iуд, хьибуд ахьасе гьикуна ая кIеджар цIакIинигIди шаб агъай.
Вун сайигIди ушуна гьадихьучи, сасра бадил ве. Ушубанра гъамм кидава, нагагь вафас агърукьай аяхаб манатилди. Алтухъ кепек ачадавей аяттис хулаъди ппара хIа кар э. Гебури акьуна кканве бурджар рекъукк ккея харджарис.
«Конвертар» агъай исалас иса вартт ве гисаъ ихьа пулра. «Зас мидегьен акьуна уйи, зун мидегьен акьасе», — агъа инсанди. Вун са шиникквдин цIакIин акьас ун ахъуна уйихаб халкьдис са верш инсандис, вахтт ккеттушуна Iудпеттис аркьагунас, вун ун дахъуттари вас ун архъай, Iу вершакк аккертIа. Мисаъ зун са вершахъас, Iу вершахъас пучи, хIекьданди якьу-гIуьфу верш ун ахъуттар аве.
Чукь вейдава ве гIалашувар, е са мукьуйил гъатайдава гебурин хIисаб. Ахир кIил найисахъди рукьая хьин? ГIезабра кеве хьес, амма хъучучIуна кканде гьерф учихъас. ЯгIа вун цIакIин аркьай вас «конвертарин» пул ачавей айчира, багайин ягъа вун хаб йисе джемеIетис гиласра ппара.
Ге пул хьин бурджуни гъуланди аяф хIисаб э. Нандиъ захъай фичи хьуфе, хьин гебурисра ун ахъасе агъа багьанабура аркьай хьин хье Iуьммур читин хьас аркьа. Чун фиштти агъа?
