Типпигъарин идже мегIелим

Мутарин ХIесанахъна Кисихъ хъайя са Ифриз агъа руш. Ге хунаяфе августиъ 1958 иса. ХIесан уч кIилин Iуьмурди кар аркай хьунафе
райпойиъ. Кисай, зас ягIагунахаб, кар аркьай хьунафе телефонисткавелди. Гебурихъ хъара хъайя гIуьфу шинуьккв сара: Тавриз, Мавлут, Байрамали, Чимназ, Наргиз. Хьин гъургъасе гебурин кехIа рушахъас, Ифризахъас.

Ифриз Гасановнайи 1976 иса хуруна ккиркIуная йицIудпе класс, Типпигъарин хIуриъ. Махьттаб ккиркIухаб ушуная Ифриз
Гасановна хурас Махачкалайиди пединсттитутиди, англо-исторический факульттет. 1982 иса, кIиркIуна гевусра, адиная ге хIуриди. Мидас районойи гьикуная Ифриз Гасановна ЧIади махьттабиъ кар акьас. Лисаъ Iу вазадала кар дакьуна, адиная ме хаб хIуриди.

ХIуриъ Ифриз Гасановнайи кар аркьай хьуная инттернатиъ, шиберин воспиттаттельвелди.
Гисаъ ги лап батIарди муйя иса кар акьуная. Гевус кедай, хъара Ифриз Гасановнайи кар аркьай хьуная Миссиарин махьттабиъра.
Те исари мегIелимар ппара гьикай вейи гьер джуре хIурариди. Адавуйи гьуркIа мегIелимар.

Миссиъ Ифриз Ганановнайи кар аркьай илгуная якьу истти. Уч ушувусаъ Ифриз Гасановнайи лап батIарди кар аркьай хьуная. Гихъас иджидала гъургъайдава ги дарсар йи шиникквар. 1991 иса, инттернат хъикIухаб, Ифриз Гасановна адиная Типпигъарин махьттабиди историбурна обществознанибур ирцIан мегIелимвелди кар акьас.

Гьете вахттунилас айяфе Ифриз Гасановна Типпигъарин махьттабиъ кар аркьай. Ги учин кар аркьа йиркIураастти. Ифриз Гасановна учин шинуьккварис ппара Iайи кканве, шиникквар гисра ппара кканве. Учин классин баб суман э ге. Фи кканде пучин шиникквари, гьете аркьайве Гасановнайи гебурис. Учин классин шиникварин дадар бабарира ппара хIа гафарар аркьа гин. Шиниккварин бабарисра ппара кканве ге.

Гьер хIаягъас ппара батIар внеклассный мегъракабур хIезур аркьафе Ифриз Гасановнайи. Ифриз Гасановна ппара Iайи идже мегIелим э. Учин дарс ппара иджи гъарефе. Ифриз Гасановнайин дарсарин материалар гьер хIурарин мегIелимарив фаве ишламиш аркьай. Гихъ ппара материалар хъайя «История Агула», «История Дагестана» агъа предметарин, учи завал акьунаттар, гьер газетариас, журналариас, хъара гьер джурайин мукьариас.

Iари мегIелим суман дава ге иджеф, инсан суманра ппара иджеф э Ифриз Гасановна. Джаллабурис кумакар аркьафе ги, учил алчархьуттарис. ЕГЭйисна ОГЭйис батIарди
хIезур аркафе Ифриз Гасановнайи учин шиникквар. Олимпиадабуриъра садпе-Iудпе мукьар гъуршанфе гин шиникквари. БатIарди кар акьувелди, ацIуна наградабура йиная Ифриз Гасановнайис.

ГIер хIа ягъас ирцIанди аве гис районойиас, махьттабиас грамотабур, подаркабур, званибур. ХIуькуматин наградара фая Гасановнайив. Ге э «Почетный работник народного образования РФ».

Хъара ппара наградабур хьурай вас че мегIелим. Джандиъ сагъвел хьурай ве, хье шиниккварис батIарди дарсар йес.

Нафият Шамсудинова

Добавить комментарий

Ваш адрес email не будет опубликован. Обязательные поля помечены *