Руш хубаъ ппара хIа нигIмат ая

Фото: ua-vk.ru

Авалдин заманабуриъ, агьалра аме, руш хугуна пушмал сурат аркьа дадари. Хlа lейиб хьуф суман аргва гебурис. Джагьилийин вахттари сур миллатари рухай аме шибер луькlей икlайи джилариъ, гебурифас гlаттивас вей авейиф суман фуш хьуна рухайчина. Агьалра ппараттар ая фуниъ ами фуш ичина ягlар акьуна, руш идехаба кедихьас аркьа.

Мухlаммад пайгъамбар с.гl.в.с. тегlрифар аркьай гъургъафи шиберихъас. Шибер ухlай, гебурин эвел аркьаттарихъас пуна ая пайгъамбардин хlадисиъ, мегlна: «lу руш ухlуна хlа акьуттис гебурикес хьасе джегьеллемдин цlайигьас кумак». Джуре хlедисиъ пуна ая, мегlна: «Я Аллагьдин пайгъамбар, нагагь са руш ухlуна хlа акьухаба? Сад ухlуна хlа акьучинара».

Диндиъ цlуьппи ая хlададари ге кардил цlуьппи гъузуна руш хуна дузди рекъуьъ ай хlа акьуб джаннатиъ гъаре курарикес э агъайи.

Имам Муслиман хабар акьу хlедисиъ агъай ая, мегlна: «Са ягъарикес са ягъа Гlайшайилди р.гl. адина ая са дишагьли, гихъай ахьуна ая гин lуд загlифди ая шибер. Хъирхlуна раккахъ  Гlайшайин, чин lу ягъ э фера даlелди пуна ая дишагьли. Гlайша ачушуна хулаъди руцуна фера даджикlина хьибу финик дала фадавай аттве. Финикар фачиянде ме дишагьливди. Ми сад са рушас, сасра джуре рушас йина, хьибудпеф гьучагъа lуьтlанас учин сивигьди. Гlайша хъуланди экьуна аве, финикари гебурин гlаш кlес даркьаф, амма чlукь гуджра йина ишттагьра гъадиваф ягlай. Бицlи шибери чиппиф фая финикар lуьтlуф, даргъа гъилар бабаф фая финикдилди, гера lуьтlанас кканди. Баба, хъуттурфуна шиберихъ, алцуна учин гашунин четинвелра, учин шиниккварихъ ахъаджихlуб гъалибвел ве. Учиф фая финик lу пай акьуна ицlанде lудара шиберис, уч гашила ами атуна. Ге кардихъас Гlайшайи р.гl. хабар аркьа учис алчархьу кардихъас пайгъамбардис с.гl.в.с. Ги с.гl.в.с. ме кар тахсир хьуна Аллагьди гьикуне дишагьли джаннатиъ, е  ккеттивуне цlайиккес».

Пайгъамбарди с.вl.в.с. хlуьлмат аркьайи учин шиберис, шадра вейи гебурис.

Садра иджи хъуттурфандава иттаттарихъ, сайира lешубара аркьайдава кlиттарихъас, хъуландава lуссеттарихъра, бицlиттарихъ шиберидегьен. Инсан lуссе хьугуна гихъ хъуланф руш э, учин шувасра, валадисра ицlан вахттуникес чlукь акьуна.

Хьимудна са дада хlисаб аркьа учин руш, шувас йиф гlунарихъас къакъ хъайхьуф суман ве агъай. Мункине гин шуй касиб, диндиъ адаваф, е хизандихъай къал аркьаф хьуб. Дадари алтухъ ахтармиш акьас алучlайдава фиштти дуламиш вей айчина чиппин шуварикк ккея шибер, е кумак акьас, е джуре кар арайил акьас. Шувакк ккея рушас кумак акьубра Аллагьдихъди багу аркьа рекъерикес э. Рушахъди хlуьлмат кканхьуб ппара хьудегьен бицlигунара, хlа хьугунара, шувас йигунара, гин цlае хизанаринра, шуван чуппаринра, багунттаринра уларигь гин дараджа вартт хьасе.

Дадари чиппин кlиркlарис ппара яб йиб, шиберихъас хум гьартай, ге хlа гъалатl э. Ягlайин ягъа хьес аргва фиштти алучlай ичина дадар чиппин кlиркlарил хулар гъуланди, идже машинар гъуланди, пулар алчихьай. Ге вахттуни руш учин шуван хулаъ четинди дуламиш вей ахьуб мункине, дадас кумак акье пас ламус вей. Гиштти хьуна ккандава.

Мухlаммад пайгъамбарди с.гl.в.с. хlедисиъ агъая, мегна: «Гlучl ухь Аллагьдигьас, сасуманди хъуттурфен ве шиниккварихъ». Мункине вахъ йицlу шиникквра са руш хъайчина, ге са руш багьана хьуб вун джаннатиъ ушубан. Бегьем хьасттегьен lу руш ухlуттис, гебур кумак хьасе джегьеллемдин цlайигьас.

Вун акьуна ая хизан — сасрайин руш э, вун файдина ая сус — сасрайин руш э. Ве рушас сасра хизандиъ фидегьен идже хьуна кканчина, гидегьен иджвел ве хулаъди файдеттисра акье.

Гьер идеми руш хугуна шадвел аркьай кканде, кlиркl хугуна аркьадегьен. Йиркlураъ шадвел адавайчинара, разивел аркьай кканде кьадарис. Вахъ хъуланди ая Аллагь, гин амурдилди гьинас кканчина руш ицlанде, гьинас кканчина — кlиркl.

Камиль Мирзоев

Добавить комментарий

Ваш адрес email не будет опубликован. Обязательные поля помечены *