Гьер са инсандин Iуьмурдин рекъ тарих э. Инсанар чаб кьадар, хIисаб адавадегьен ичира, сайин Iуьмур сасрайис ухшар вейдава. Гьемиштти гьерттин четинвелар, азиятар, рехIетарна иджвелара сад дава. Сайис ппара загьмат алчархьа, сасрайис — алчархьайдава. ЯгIайин ахттилат э Типпигъарин хIуриъ яшамиш вере Байрамова Сагибат Рамазановнайихъас.
Сагибат Рамазановна са агъзурна ерчIу вершна ягъцIурна еридпе исан къана садпе февральдиъ Рамазананра ФатIиматан хизандиъ хуфе. Хизан мебурин хIа и. Сагибат ччиччай кедавай хизандиъ хъара Iу кIиркIна хьибу руш уйи: МутIалим, ИсхIекь, Байранкъиз, Савадат, Iешура.
«ХIа инсанари агъафе, нагагь са гъилик кея тIубар сад суманттар верехаб, са дадар – бабарин шиникквара, гебурин хасиятар агубара сад хьас и, амма миштти дава.БицIи Iуьмур хIа хьучира, хIа хизан э пуна час е гаш, е мекI, е са четинвел алчархьундава. Зе дад гьемишан финотделдин бухгалтер и, ревизорвелар аркьафи. Iелеттин аликIаттин дарвел час ирцIандавуйи. Зун бицIиф идехIела, заал алтухъ байирдин курара дадан хулаъ алчархьуфттава. Зун учра хурубаъ гIешкъар аяфи. ХIа чияри дадас гIерзабур аркьафи ге хье ягъди китабар агьахъуф эв агъай. Дада гебурис джуваб ирцIанфи, зун кидата ханджал хьурай агъай. Ке идже вахттар и мебур. Джалла мехIелайин шибер завал хьуна элхъенди дурхIай авейи. Кинойиъди верефи. Мангарин ХIесанан къварикк кичучIуна концертар аркьафи. Мирзабурин Тамам концертин хIаф верефи. Акьуна кIеджарикес билетар, масса ирцIанди мехIелайин шиниккварис. Ке хIа роль фая артистка и ХIашагIбанарин Магьият. Мис дагIаф адавуйи: индийский мегIнибурилас мич аркьафи. Маевкабуриъди верефи.
Мактаб ккиркIвасра хъучадархьуна кьабул акьуне зун кар акьас редакциъди. Зун и весттава кар акьас, зас хурас вес кканде агъаф, дадна чу и ях агъаттар. КIилин ваз дегьен хьуне приказ акьуна зун кардил давей. Мебурин гудж ппара хьуна ахира ушуне. Хабди гьамидас гьикуне ленотипистарин курсар хурас. Хурухаб адина печатный машинихъ кар акьуне. Радиовещанин редакторвел акьуне, отдел писемдиъра кар акьуне, партийный организацин секретарь хьуне. Шувас ушухаб чин аттархьуне Казахстандиъ. Гьетисаъ ая са исара редакциъ кар акьуне. Са исалас хьиджардад кIина гIаттиф сара ушундава. Хаб унахъуне зас хье редакциъди. Сара амилгуне мисаъ.
Шувас ушуна, хьир файдина, хизан арайил аркьа сад сайин гъавурдиъ ай, гъил гьучихьай, кумак аркьай, нуьхIуьбат, хIуьлмат, баракат хъай Iуьмур гьикас пуна. Амма зе кар миштти хьундава. Дадан хулаъ дагу гIезабар, сакин дава йиркIвар, шуван хулаъ зас кIилди агуне. Уч высший образованибура фай Iекьул кея идеми ичира, ухубарил ппара гIешкъ хьуне мин. Хизан, шиниккв ул икIунара аргвайдавуйи. Хьибуд музе шиникквара арайиъ ай ахира джуьре хьуне. Са ягъа зун кардил але вегIдайиъ, адина Iудара хIа кIиркIар бабафас фаттивуна файшуне чиппин дада. Сара зас мебур агундава. Зунра хъучушуне, милицабурисра пуне, амма фера акьас хьундава. БицIи кIиркI захъай хьуне. Амма хIа шиниккварихъас ягIара кегьей руцIа, Iуьр йиркIураас кам дава. Валадарин къакъ ппара хIаф э. Ме вахттари суман мункинвелар уйихаб, зун гебур джилин кIенаас хьунара джикIес и. Тегуна алтухъ улакьар адавуйи, е телефонар адавуйи. Зе Iуьр зас э пуна, ухIай бицIи кIиркIра давамлу акьуне Iуьмур. Удигьай дадан хулаъ хьуне, хуппай цIегIуьфу – къа истти сасрабурин хулариъ хьуне, хабди арайил акьуттаре ме хулар. Къакъара хъахъуне ме IуькIер ме кIурар дагъай. Iу-Iудтти хIукуматин курара акьуне. Зун кар аркьа гагьди мисаъ цIегIуьфуд редакторар духIуба хьуне. Амма гьемидегьен гагьди е са даккан акьундава, е са дава ахттилат акьундава, джаллабури ппара дуьхьуна кар акьуне. Джалла завал хьуна хIаягъара аркьафи.Фиштти хьучира зе Iуьмурдил зун рази э. КIиркIра сусра ая хулаъ, хьибуд хуттулара ая. Мебурикес зе йиркIв сакине. Зун мебурил рази э. Чугъсагъул хьурай чиппис», — ахъаркьа Сагибат Байрамовайи.
Салихат Малагусейнова
