Дагъусттандин хlуькуматин медицинский университетиъ 29 сентябрьдиъ хьу маджлисил йине медалар дагъусттандин волонтерарис «За бескорыстный вклад в организацию Общероссийской акции взаимопомощи #МыВместе» агъа, хье хlуькуматин хlатти Владимир Путина арайил акьу акцихъас.
Мисаъди адина уйи дагъусттандин джигьиларин курарин министр Камил Саидов, Дагъусттандин здравоохраненин министрдин заместитель Раиса Шахсинова, Дагъусттандин трудинра социальный развитин министрдин кумакчи Джабраил Дайзиев, хье региондин ОНФйин исполкомдин хlаф Джамалудин Шигабудинов, хъара ДГМУйин социально-воспитательный курар аркьа джемеlетихъай гъургъа проректор Эльмира Абиева.
Учин чlалариъ Камил Саидова чугъ-сагъул пуне йиркlураастти акьу лихунинра, кумакинра, хъара волонтерар хье заманайин игитар э пуне.
«Хье джигьилар, хlекьди, ке зурбабур э! Чугъ-сагъул джалла волонтерарис, йиркlураастти чиппин джан алихьуна кумак аркьайи инсанарис, алучlайи чиппикес муфеlэт верегъилди акьас. Акция акьуне джалла муниципалитетариъ, зас ягlа, дагъусттандин джемеlет садтти идилгуф чиппин балабурихъай. Хье республикайис ппара наградабур хьуне, ги агъая, дагъусттандин джигьилари пандемия аягуна ке зурбадалди агвар акьуне пуна чаб», — пуне Камил Саидова, хатl ккеттирхlуне, Дагъусттандиъ клуб акьуна ая пуна #МыВместе агъаф, четин хьу вахттарис халкь бадалди.
Учин багухъас Джамалудин Шигабудинова хьу медалар мубарак аркьай волонтерарис, ахъакьуне, акции са усал акьуне пуна джалла гьавабурин инсанар.
«Ме акцин ке арайил хьуб э, зас ягlай, республикайин гьер инсандис ягlархьуб уч садтти адаваф, учин багулиф инсанар фаяф, кумак йис гъил даргъаттар. Ме карди агвар акьуне, лазим хьу вахттуни, хьевас завал хьуна арайил акьас ве удигь гьая курар», — пуне ОНФдин региональный исполкомдин хlатти.
Ме маджлисил ттурар гъадивуне 173 волонтердин, lайи ппара завалхьубар дахьас мебур хьибу пай акьуна уйи, Роспотребнадзорди джалла пе къадагъабура акьуна.
Дуз хьасттавуй хье игитара гlадавуйихаба мишттин идже маджлисигl. Хьидин хаб гьер хlурариъди вей касиб, агъдарукьаф ахтармиш аркьай кумак ицlанди удигь кlил акьуна уйи Агъул райондин волонтерарин хlаф Сиражудин Шамсудинов. Агъул райондин игитари сасрабурира фату пул, шейъ фачийине хье джемеlетис.
«Хьидин хаб гlулисттегьен удигь кlил акьуна хье райондин хlаттин Закир Каидован кумак хьуна, чин, волонтерари, халкьдис фарта кумак пулулдира, lелеттилдира рукьас акьуне гьерттихъди. Джаллабурин кумак йидегьенттарин ттурар зун пасттава, амма зас пас кканди ая чугъ-сагъул джаллабурис: захъай шейъэрна пулар пай акьас кумак акьуттарис, хье халкь бадала садакьа акьуттарис, хlурарин имамарис, идже чlал агъай, дуьгlебур аркьайиттарис. Акьу садакьа джаллабурихъди иджвелин багухъас рукьурай»,- пуне Агул райондин волонтерарин хlатти.
Камиль Мирзоев
