Магъу ая чархарин мугIар

Магъуъ ая чархарин мугIарихъас ликIина аяттар хурастти кканди зас гьертти учи учис суал алихьуна, хьиму чархунин мугI ая пуна гисаъ. Ле кар тамаш э зас, джалла гисаъ ая мугIар ппара ухшар э сад сайис, зас ягъди Iу мугI дала аяф суман вейдавуйи гисаъ, зун ягъди ахтт- вартт вере инсан ичира. Агьалра нае мугI найисаъ гьайчи чIукь гIачархъа.

МагъугI гIая хьибуд са чархунин мугIар, Iу мугI сад сайигьас вархайи давай ая са верш митIри дала гIадавай, са мугI ая дихьи хьера Хеварин райондин арайиъ ая мугIуйиди гьучарукьастти хьегьас ахтт верегуна. Завас вередегьен руцуна нае вахттуни акьуна ая мугIар ичи ишанар джикIиндава. Са мугI аргва удигь вегIдабури акьуна уйи мугIуйин багулив акьуна аяф идеф агъикIуна аме мугIуйин кьабарилди.

Ге мугI э хьегьас верегуна кеадихъ хъаяф. Уч мугI ппара цIуппи акьуна ая, гьавара иджи ая. Аргва ге мугI, кIенаас кIилиди пас хьасе цементин луз гIихьай акьуна аяф э пуна. Са багв чархун гъузуна ая цIуппе дагьарил, джуре багв, алтухъ нецIв алдархьа нецIун къирагъил. Са арайигьас бурджар алахъуна айчира ге мугI зас агуна ая мугIарикес кецIуппе мугI пас хьасе, кеидже.

МугI фидегьен цIуппи акьуф ичира, фундаментар фидегьен дагьарил алийина акьуна айчира чIир вере шейэр э. Гьеммишан илгва шейъ ме дуьяйиъ адава. Хьесра хье шиниккварисра, хуттуларисра илгвангъилди сачIукь муз хъуттурфуна, ахъаджихIуна канве гьер шейунихъ.

Гьеме мугIара угъалин хьед ярх хьуна алдархьагъилди акьуна, гъван адархьу мукь дуз акьучин савабин кара э, хьевас йиркIурас рехIетти ишлемишра акьас хьасе.

К.Мирзоев

Комментарии закрыты.