Лагьманарин шибер

Лагьманарин Лагьманра ХIуьри мус хуттар ичин, мусс кIиттар ичин гьинасра ягIай адава. Хабар гъушанас фушра багу кIилинттара андава. Гебурихъ хъай уйи хьибу руш. Ге шибери ахъаркьайи, чиппис бабанра дадад хъуьсу ягIайдава агъайи. Баб гебурин шиниккв  хубалас кIинафе. Хуна рушра кIиная.

Дада акьуная цIе хьир, Iу рушра хъаф. Хабди армиъ учра кIиная. Баб луькIегуна ке хIа рушан якьу-гIуьфу исдала давуйи, дад луькIегуна якьудпе классиъ аяфи. Чаб бицIигунан хаб ятумаре агъайи гебури. Шиберин ттурар э: Салият, Сагибат, Пери.
«Даху баба ппара кумакар аркьайи час. Джинди учин шувагьас гуни, нис,ччам ирцIанди час. Ададарира кумак аркьайи час, чиппифас верегъилди», — ахъаркьафи ме шибери.
ХIа руш шувас ушуна, илгуная бицIи Iу руш. Язнайира ччиччи кумак аркьай хIа акьуная мебур. Сагибат ушуная хурас медучилищейиъди Дербентиъ, Пери поварарин курсариъди.
Хуруна ккиркIухаб адиная мебур хIуриъди. Сагибат хьуная кардил райондин больницайиъ медсестравелди. Пери хьуная интернатиъ ая шиниккварин повар. Хабди Сагибатакес  хьуная старшая сестра райбольницайиъ, Пери хьуная повар райондин столовойдин.
Сагибат ушуная шувас, КьецIарин Базуйис. Ппара ягъар, Iуьшар руцуная мебурил. Хизан йиркIуран ппара идже идеми алчархьуная мил, амма хьибцIурна Iу исдала давай дахи кIиная гин шуй. Гебурин хизанарин арайиъ хьуная якьу валад: хьибу рушна са кIиркI. Ке хIа кIиркIан цIеери исдала хьуна адава дад луькIегуна.
Ке Iайи кумак герек вахттуни садтти ухIуна хIа акьуная ги учин шиникквар. КIиркIа хурас акьуная политехнический институтиъ Орджоникидзейиъ . ХIа руша ккиркIуная пединститут МахIачкъалайиъ, бицIи шиниккварин мегIелимарин факультет. Iудпе руша хуруне медучилище Дербентиъ. Ке бицIи руша ккиркIуне пединститут МахIачкъалайиъ, факультет психологии. Сусра акьуна, шибер шуварисра йина, арайил акьуне ги учин шиникквар.
Учин шиниккварис кедай, хуттуларисра ппара иджвелар аркьафи Сагибата. Гъилин ппара джумарт хьир и. KIилди райондиъ аядегьен учил алчархьудегьен инсанарис учивас агърукьа дарманарин кумак акьасра алучIафи ми.
«Иттаттари ду дарман Iелеф? Гебурис ду дарман акьунаф? Дарман хьурай чвас гьеликес», — агъайи ги.
Агьалра Сагибат дуьяйил андавайчира чугъсагъул агъай, йиркIурал аркьа инсанар кам дава михъас. Хъая гьаге са кIиркI, учин дадан Iуьмурдиъ ай, джигьилди ами кIине авария хьуна Воркутайиъ.
Пери ушуне Гехъуьнди шувас. Ппара гагь хьундава гин шувахъай, ккейчIуна адине хаб хIуриъди. Аме Iуьмур фатуне Пери учин хутталарихъас лиханди. Ппара Iайи кканди гис учин хуттулар. Фуш гIеджизди айчин, гьетис гъил гьучихьайи Пери. Учин къуншибурисра ппара хIуьлматар аркьайи. Сагибатан шуй кIихаб, Пери ушуне гихъай экьвас  гин багуъди. Сагибат бицIи чи ичира, Перис ге училас хIаф суман вейи.
ЙиркIв алиянди гил, пефра аркьайи. Iайи алдуьхьуь чияр и гебур. Чиппин хIа чира ппара  ккан вейи гебурис. Чиппин баб суман вейи. Сад сайин хатириъ кьацIра ихьуттар давуйи гебур.
Хьибудара чияр ппара дахи кIине. Пери кIине 20 сентябрьдиъ 2011 иса. Са йицIу ягъ дала гIаттдушуна, 1 октябрьдиъ кIине Сагибатра. Iудара хъай ушуне идже чияр.
Чиппин гунагьарин гIефу акьурай. Джаннатиъ мукь хьурай!
Нафият Шамсудинова

Добавить комментарий

Ваш адрес email не будет опубликован. Обязательные поля помечены *