Исан арайиъ вере вахттарикес зас ке ппара ккане вахтт э хьидна гIул, зун фикир аркьа гьелиштти джаллабурисра э. Ккане вахтт суман джалла гъузуна аве инсанар, нахширар хьидихъ. Хьид дуья ачухъ вере вахтт э, мекIер алттархьухаб дуья ибгIа хьугъилди гъазе ве чIирар. Шагьурариъ дахи гъазе вейчира, хIурариъ бицIи кьанайи вереф, мартин ваз алттархьуна апрельдин вазала гъванкIараъ бицIи ибхьеринттар амичира, гюна багвар уьцIуна, бицIи гъазе хьуна аве чIирар. Ме вахттуни агъучIа садпе меджар. Авалдин емиш булди адава вахттари хIапай хIурариъ ая инсанарис хьидана емишин, яккун еринди аяф э меджар. Агьалра фидегьен емиш булди айчира, ачухъвелар айчира, меджар мус хьасе агъа суман гъузуна аве. Ке ппара меджарихъ гъузуна аве хумбар, агъучIугъилди завал акьас. ХIа гаф аркьа суман аве сад сайин удигь меджарин ямаг акьугуна. Фас пучина меджарикес акьу чIакьаферар, кьутIурар джаллабурис ккане, кьабул вере ямаг э. АгъучIа меджар хьидана, верефе гебур чIал суман гьер мукьариъ. ЯгIайин ягъас хье дуьйил алди ая 50 джурайин меджар. ЦIабар ме IуькIуьн кьацI икIаттаре. Чаб чIал суман хIисаб аркьайчира, цIабар кьацI икIаттар ичира, лап хайир кея, инсандис Iуьмур ирхе аркьа IуькI э. ЯмагаригI суман ме IуькI ишламиш аркьа джерехIвелдис. Ппара инсандис лазим вере витаминар гIая меджаригI. Хъара лап авалдин вахттари меджарикес аркьай хьуная ттунар. Меджарин ттун ишламиш аркьай хьуная пачагьарис аликIа кунаригI, хъара аркьай хьуная аккихьа ахунар, Iурдеккенар, джандис сагъвел хьас, ирхе Iуьмур хьас. Агьалдин вахттари хIалатутис, бембегис кьимат аркьайчира, те вахттари хIапай ишламиш аркьайи меджар. Ишламиш аркьа меджар хъара косметикайигI. Ке ппара гIачарта шампунаригI, кремаригI, джаллабури гIешкъунихъди гъуянди шампунь медж гIаяф. Авала суман агьалра шампунар айчира, ишламиш аркьа меджарин хьед кIилин чIар аладавес. Хъара агьал суман джаллабурихъ холодильникар хъадавуй, Iашу якк ухIас ишламиш аркьайи меджарин цIабар. ГIараджуна цIабаригI якк икIай хьуная къуйдиъ чIир дахьас. Ппара инсандис хайир кея IуькI э медж. Завал аркьа меджар хьидана, хъара цулана. Завал акьу меджар верефе рукъас акьас, агьал заманайи ая мункинвел инсанарис холодильникариъ ухIас.
Наибет Гасукаева
