Дуьйил алдея динарикес ке мертте дин хIисаб аркьа мусульман халкьдин дин — Ислам. Хье динди хьес агъа, инсан хьудегьен йиркIуран мертте хьуна кканде пуна. Иджвелин курар ппара акьас алучIуна кканде, маслихIет, нуьхIуьбат, баракат хъай, сасра инсанарис гиран, даккан даркьай, гьикуна кканде чиппис дуьйил йиная Iуьмур.
Диндиъ ая иджвелин курарикес ке хIа савабин кар э садакьа. Мин кьиматра, анра хIа э. Гьемихъас идетаре ме АллагьутагIелайин садпе тIалабламара идеф учин лукIарикес. Хье пайгъамбардин (с.гI.в.) хIадисариъ агъа: «Джумартвел кIур хIисабе мерIер ушунаяф джаннатиди, кулар фатунаф дуьйилди. Кьис-кьисвел (чIиревел), ме кар хIисабе кIуранин мерIер ушунаяф джегьелемди кулар фатунаяф дуьйилди».
Садакьа акьубан гьер инсан барамбар э, ппара хайир э дуьйил суман ахиратисра. Амма ме фарз дава, гьер инсандин учин йиркIурастти ният акьуна аркьай кканде савабин кар. Аркьа садакьа гIеджиз халкьарис гебурис са бицIи кумак хьурай пуна. Кумак инсандис акьас аттрукьаяхаб аркьа пулун, кканчин лазимди ая шейъ гъушун, кканчин Iеле шейъ хьурай, кканчин дарман. Нагагь гIеджиз инсандин дуькандик кея бурдж кедихьучин джинди, хъара хIа садакьа э.
Кумак кканеттис кумак акьубра савабин каре, хъара нагагь инсанди кIур узуна, ге кIурани батIар мехIсул йина, нахширари IуьтIучира садакьа э. Рекъуьъ мушат аркьая гъван гьадихьучира зейдайи саваб э. Ппара пегуна, ппара курар, мункинвелар ая инсандис садакьа акьас, иджвелин курар акьуна, саваб къазалмиш акьас гьалдин вахттари. Гъилариъ аяттара ппара ая, гьемиштти гIеджизара ая. Ке хIа кар э герек вахттуни гIеджиз инсандис гъил гьучихьуб.
Садакьайин ая шартIар. Садпеф, хье шериIети хьес агъа садакьайис адава гIаттивуная ягъар, сеIетар. Ккане вахттуни акьас вере кар э. Амма Рамазандин вазала акьу идже курарин, садакьабурин савабра алтухъе. Iудпеф, хайрат ирцIангуна, инсанарис даргвай йина кканде. Хъара хье динди хьес агъа, хIуьрджал гъили ирцIан шейъ чехIпил гъилис даргвай йина кканде пуна.
Хьин аркьа садакьабур хIуьлал пуларилди аркьаттар хьурай.
Наибет Гасукаева
