Iурдин шиниккварин дурахIелар

Авала шиниккварин йиркIв алттвес, элдемиш хьас, ппарагIди фера адавуйи. Бабарисра алтухъди шиниккварихъ хъучевес вахтт авейдавуйи. ДехIела шиникквари чиппи чиппис джиркIенди исан гьер са вегIдайис хъудуьхьуь дурахIелар. Iурд хьугуна шиникквари чиппин вахтт фартафи мерккурал.

МурхIара фай хIаф-бицIиф дагъай аллахъуна авейи мерккурал, цIухалаяр аркьай. Багами хулаас аттушуттар Iуьшахъди дала рукьайдавуйи. Сур вазалан Iекуккесра кехIей цIухалаяр аркьай илгванди. Гаш дахьас джибиниъ икIун нисна гунира фавейи.

ЦIухалаяр аркьайи мурхIарилна санкабурил. Сайихъ Iуйихъ хIукуматин санка хъайчира, хIа паярив фавейи чиппи акьу мурхIар. ХIа суман шиникквари аркьайи чипписра, чиппин бицIи чияр-чуппарисра куранин мурхIар. Гьертти учин мурхI учис кканегъилди дуьрхьейи, алчекьугуна ибгIа хьас, гIудул хьас, алартIайи кьудакь.

Хъара Iар алгъархьегуна хьед акидичас, алартIайи мурхIун къабахъди резинин кьурцар. ЦIухалаяр аркьагуна шиникквари чиппин арайиъ аркьайи бехIсар, сайи сад хъадихьаттар аркьай. Иджи гьикас дагIаттар архьайи кIулкIумиъ, хуппай керхьун хьедра алчархьайи вес хулади.

ЦIухалаяр акьуб кедавай, нецIул мерккв цIуппе хьегуна, кегъархье суман шиникквари дурхIайи хоккей. ДжикIина IирIе суман мукьра, хьуна Iу пай дурхIайи. Гьерттив фавейи чиппи кураникес акьу клюшкабур, шайба аркьайи резиникес, туьлле къайдайин гъвандикес.

ДурхIубан гIешкъунис шиникквари гаш, мекI, иттар акьуб алгъартай давуйи. Гьалдин шиниккварис джуре эл ккеттвере курар ппара ая, идехIела мерккуралра алтухъ фушра аргвай андава.

Батитай Габибулаева

Добавить комментарий

Ваш адрес email не будет опубликован. Обязательные поля помечены *