Идже хизан хье милатарин девлет э. Мегелай хьин ликIенасе Рамазанов Ибрагьимхалил Магомедовичан Iуьмурдихъас. Ибрагьимхалил хуне Агъул районди Цирхьеарин хIуьриъ хIа хизандиъ. Дад Ибрагьимхалилан МухIад э Буршагъарин хIуринф, баб Чизай Цирхьеарин хIуриас. Джигьил вахттари Ибрагьимхалилан дад ушуная Цирхье мегIелимвелди кар акьас мактабиъ. Мисаъ кар акьас ушу усаъ акьуне учис хизанди Цирхьеарин хIурин дишагьли. Магьмиштти башламиш хьуная мебурин хизан. Хуная мебурис 7 шиниккв- 5 кIиркIна Iьу руш. Ке хIаф шиниккварикес мебурин э Ибрагьимхалил. Якьудпе класс ккиркIвастегьен Ибрагьихалил амилгуная Цирхьеъ. Хабди аме классар хурас ушуная ме Типигъ. Фас пичина, те вахттари бицIи хIурариъ афдавуйи хIа классар. Ибрагьимхалилра 4 пе класс ккиркIуф чиппин дада гьикуная Типигъ 5 классихъас хаб 10 пе класс ккиркIвастегьен. Хурая вахттари дуламиш ме хьуная интернатиъ. ЙицIудпе класс ккиркIухаб, 1969 пе иса кар акьуне хье «Агульский» агъа совхоздиъ. Хабди 1970 пе иса ме файшуная армиди, Венгрия агъа хIуькуматтиди. 1972 пе иса ккиркIуна служба, адине ме хIуриди. Гьеме иса октябирдин вазала дадар- бабари акьуне Ибрагьихалилас хизан Буршагъарин хIуриас ппара шиникквар хъая дадана- бабан руш Айшат. Айшатахъ хъая хьибуд чияр, якьуд чуппар. ЕрчIудпе класс ккиркIуна, Айшат учIуне хурас Махачкалайиъ культпроссвет училищейиъ библиотечный отделдиъ. ЦIакин акьуна йицIу ягъ алттархьухаб дад Ибрагьимхалилан кIине. Дада, уч кIестти,Ибрагьимхалилас тIалаб акьуне Цирхье мегIелимвелди кар акьас дадан йеринди. Хабди 1974 пе иса Ибрагьимхалил учин Айшатра хъай гьикуная Iемухъарин хIуриди мегIелимвелди кар акьас.
Ме вахттунис Ибрагьимхалила заочно хурай уйи Буйнакский кооперативный техникумдиъ товаровед отделениъ, хабди учIуная хурас МахIачкъала шагьурди трудар ирцIан учительдин ккурсариъ. Iуь исалас, 1976 пе иса, ме гIативуне Амухъарин хIурин председательвелди сельсоветин.
1982 пе иса Ибрагьмхалилас башламиш акьуне Типигъарин хIуриъ столовойдин заведующийвелди кар акьас. Айшатаc йине кар столовойдиъ буфетчицавелди. Ме вахттунис мебури хъай хьуная хьибуд шибер. Хъара Ибрагьимхалил учIуне хурас Саранский финансовый институтиъ. 1985 пе исаъ февралдин вазала хуная мебурис кIиркI. Гьеме иса майдин вазала мебур айчIуне Агъул райондиас Каспийск шагьурдиди. Шагьурдиди адегъилди Iудархъай хьуная мебур кардил Горторгдиъ. Ибрагьимхалил заведующий, Айшат дукванчивелди. Са исалас ме ушуная кар акьас сасра мукьуйиди Коопторг агъа идарайиди. Хабди мис тIалаб акьуная кар акьас 1995 горонойиъ. Мисаъ кар акьуне ми 2012пе исастегьен. Гьеме исалас Ибрагьихалил пенсиди ушучира, амма кар акьас ушуне мактабиди Каспийскди 1- пе школайин директордин замвелди по АХЧ. Айшатан ая учин ариш-вариш, кар аркьая торговый центрдин хIавелди. ЯгIайин ягъас мебури хъая цIесад хуттулар, сад правнук. Дуламиш вея мебур маслихIетилди джалла багу-кIиларихъай. Вере 2022 иса мебурин 50 ис вея хъай дуламиш вей.
Наибет Гасукаева
