Iайвел маркьа

Ушуне вахттар, заманабур, алтушуне ягъар-Iуьшар, улар алакьуна дахъуф суман вахттдала ккеттдушуна ягIар даверегъилди духIуба хьуне дуяра, дуяйил але инсанар. Дуя духIуба хьуна машинар, телевизорар джуре шейэр аттархьучи инсандис иджвел вереттар, инсанар чаб духIуба хьуна ая чиппи  чиппис Iайвел аркъагъилди.

Iайвел пуна чIирхIе кураригI гIачучIуна ухай, дивай чиппин джанарил зулму гъай. Ге  кардихъас  пасе хьин гьер инсан учин джандин эеси э пуна. Зас кканди уйиф ме хатIариъ хIекъдан инсанди инсандис  аркьа Iайвелихъас.

Джиларин ппара лазимвел ая, машинар алтухъ адава вегIдабури  инсанари  аркьайи  хулар  гIукъуна, кикъуна, сад сайис вере  мушатихъасра фикир аркьайи. Агьал цIуьре хулар  ая  мукьаригIас  гIаттверегуна, ул ачатугуна аргва  гиргенди  кейцIуна гъван, ацIун загьматра  алихьуна акьуна  ая  гиргенди  цаларин  мурттар, хулариъди агъавере  зулерар  джемеIетис  мушат  вере  мукьуйигьас  исал  акьуна,вартт  агъавередеген-IирIи.

Цаларин  гиргенди  агъфайшуна мурттара, хьин фикир акьучи, агъфайшуна аяф хIа пай  митIрина алтухъ э. Ге кар акьуна аяф Iерабурис  мушат  дахьурай пуна, фур вере мукьуйис. Ппара  нуьхIуьбат-хIуьлмат уйи тегуна.

Гьалдин вахттара  хьин  хъуттурфучи ппара  мушат, зарар э аяф. ЯгIархьас-ягIайчира, фикир  дакъувелди эв ге, е  кьасусттира аркьаф эв, хулан хьурай е сае  цал  хьурай айчIуна акьас, е  удигьай мушат кей уйчи, хаб гиштти акьас алучIа. Цалар, рекъер ппара  гагьди илгвван шейэр э.

Цал акьуна рекъус мушат акьучи гунагьин кар  э, халкьдин рукъалра киркьуб  мунким э. Нагагь вун аркьай ая цал чIукьдехIера ачадивуна акьучи рекъ бадалди, мушат дахьас пуна, ге рекъ инсанари е нахширари ишламиш аркьай амедегьен гагьди ге  инсандис саваб ая уч кIичира. Иджвел акьас давей аяхаб, зарар йис, Iайвел акьас дехIера яцI акье дакьас.

 

К.Мирзоев

 

Добавить комментарий

Ваш e-mail не будет опубликован. Обязательные поля помечены *