ХIуриъ акьу цIакIин иджи вев хъара шагьурдиъ акьуф?

Инсандихъ хъая шадвелдин ягъарикес са ягъ — цIакIинин ягъ э. Шиниккв хе ягъанилас мич дадан–бабан йиркIуран хиял э ме ухIуна хIа акьуна учин мурадихъ рукьас акьас. Мурад фи э пучин, гьер инсандин мураде учин хал-мукь ккийина, хизан акьуб.

Авала цIакIин аркьай кIилин хIефтта вейи. Гьал инсанарис ягъархьуная ирхе хулар дакьуна цIакIин акьас. Гьертти учис кканегъилди аркьа. Ая хье гIедат идегъилди Iу ягъа цIакIин аркьаттара са ягъа сусанф, са ягъа наврузбегенф. Ая са ягъа Iудари гIай аркьаттара.

Iудари са ягъа цIакIин акьас алучIа шагьурариъ. РехIетвелдихъас фикир акьучин шагьурдин цIакIин идже хIисаб аркьа. Шагьурдиъ цIакин акьас вахтт ккими къайгъу акьуна кканве зал фацуна. Гьер залдихъ хъаве чиппин иде кар аркьа хумбар. IуьтIубар хIезур аркьаттар, агьиланди гьаттиваттар, къабар Iуьрччанттар. ЦIакIинилди ади багу-кIилинттарис фера авейдава аркьа кар. Адина, экьуна, IуьтIуна цIакIинин гьавара гъадивуна ве. РехIет ичинра амма ацIунабурис кканвейдава шагьурарин цIакинар.

ХIурин цIакин идегуна ягъар ккими башламиш аркьа хIезурвелар аркьай. Палаткабур дивай хIа хIеятар, гIанар хъаттари. Адаваттарис ппара четин ве кIилди цIакIин хулалас верегуна. Къабар–хIуьягар гIаттгъай. Ягъ ккими багами дахи башламиш аркьа мал руккуна рудар Iуьччанас, яккар хIезур акьас, Iуьшахъди завал хьуна багу кIилинттари чIир давере суманттар хIезур акьуна арта. ХIурин цIакIинис кумакара ппара кканве. Багу-кIилинттар, къуншибур джалла алчахъуна аркьа кумакара, цIакIин кIили файшуна гъадива гьавабур. Бизарвелар хьучинра, тамашабура ппара аве. Джигьиларисра кканве хIурин цIакIин. Амма са кар идже кьабул вейдава инсанари. КIилин Iуьмурди хIуриъ яшамиш вереттари цIакIин шагьурдиъ акьугуна. ЦIакIинин эессис рехIет ичинра, хIуриас вереттарис четин ве.

Са чIалалди гьерттис уч ая усаъ цIакIин ккийиб ухшар э!

Луиза Гусукаева

Добавить комментарий

Ваш адрес email не будет опубликован.