ГIулиас айчIва вахттна цIулиди ачавере вахтт ке Iайи алахъу вахтт э хье хIурариъ мал-къара ухIа инсанарис. Фас пучин, малар ухIа хизанарин фикирди аве чиппис Iурдис къафун ахъийиб суман, маларис ахъийибахъасра фикир аркьа. Ме IуькIер, сумар акьуна арайил хьухаб, джалла курар бегьем хьуф суман ве малар хъая эесибурис. Гьер иса сасумандира вейдава — IуькI ая исара ве, адава исара. Ме иса ке Iайи IуькI тIушас алучIу арайи, алахъуна, са ягъра гIадартай, угъуне угъалар, идехIела найч ушучира, эвел акьас даведегьен IуькI хьуная чIирариъ. Алтухъ гIарариди адайчIунара, чIире хуппурар уцай, IуьчIалар уцай ахъиланди ая инсанари чиппин маларис Iурдис хъафун.

Фикир акьучин, авалан вахттарихъ хъуттурфуна, рехIетара ппара хьуная ме кар бадалди инсанарис. Хье хIададари суман, дирециккес гъад ккейшуб андава, ахъатуна бензинра уца мотор ая дирецарилди. Хъара чаб IуькIер хулахъди хъучафайдибанра рехIетвел хьуная, тюкар аркьа тракторар хъая эесибур хьуф хье райондиъ. ИдехIела хьудегьен тюкар аркьай ачахъас алучIа инсанари, хабди керхъагунара рехIети, дахъусуна ккехъасра идже верехIела. Сад сайил алиланди, мукьра чукь фарцанде мухIуйиъ икIагуна.

Авал заманайихъ хъуттурфуна, машинара ппара хьуна ая инсанарихъ. Чиппивас вередегьен муфиIэт машинарикесра кеттива инсанари агьал. Авала IерабайигI гIикIай, къакъар аркьай гъайчин, гьал ахъуна садилди са грузовой машиниъ гъа. Грузовой машин дахьучин, сад- Iудра андава УАЗ машинар хъудаваттара, гьегебуриъ икIайра гъа хIапаяри, садра бизара дакьуна.

Амма фидегьен рехIетар хьучира, исалас иса малар ухIа инсанарин сан чукь хьуная. Маларикес кеттивас вере къафун пул йинара гъушанасра ве агъай, ухIас алучIай андава. Ая сасадара, хулахъ духIай, байирдиъ ухIаттар, чиппин багайин ягъахъас фикир акьуна. Эгера са-Iу мал хъай масайичин, хулас фичира са хIа шейъ гъушанас садилди пул хьасе пуна, ера хал-мукь акьас башламиш акьасе пуна.

Гьер инсандис ягIа учис фиштти иджи ичин, учин хулан дуламиш фиттилди ичин. ИдехIела, е ухI, ера мухIа пас сайивасра хьасттава.

Батитай Габибулаева