Финик муфеIэт кея емиш э

Дуьйин варттал ая ацIуна гьер джурейин емишар. Ая хIаттар, бицIиттар, иттеттар, IуьчIеттар, кьацIра уларис дагуттар, тIегIемра фишттинф ичин дагIаттар. Зас ахъакьас канде са тамашин емишихъас — финикдихъас.

Джалла хIуькуматариъ кегъучIа емиш дава ме. Мис кканде ягъди ибгIа мукьар. Хье вилаятиъди мебур гъа Алжирдиас, ОАЭ, Тунисдиас, Мароккойиас. Ппара муфеIэт кея мебурикес инсандис. Ме емишигI гIая ацIуна джурейин витаминар: В1, В2, В3, В6, В9, D.

Кумак ве финикарикес йиркIурас, рударис, лекIуьс, мухур хъаттис. Амма алдай ппара IуьтIунара кканвейдава мебур. Фас пучин, са ппараттаривас дадуьхьуьна гъадивас вейдава мебурин гьава. Ахьал Рамазандин вазала джалла бусулман халкьди ухIая сивар, инсанари ппара гъуланде финикар сивар гьартагунас.

Са багухъас саваб э финикдилди сив гьатуб, сасра багухъас джандисра муфеIэт э. Сад-Iуд IуьтIуна са бицIи гагьди гъузугуна, инсан сад пуна кецIуна арцIа. Хабди алтухъ ппара IуьтIанас вейдава. Сагъвелдис зарара вейдава.

Уч агубас финик бицIи кIаре емиш э. Амма тIегIем ппара ширинф э. Мебурихъас ая са мисала.

Бабахъ хъахьуная са кIиркI. Хъая са кIиркI ухIай ахьуная ми мехIелди, цIиялди. Амма гуни Iелдава агъа кIиркIа, ппара дард кехьуная бабас. Учивас вередегьенттар акьуная ми. Сагъилди, ихьас хьуна адава кIиркI гуниъ. Са ягъарикес са ягъа, ушуная баб учин кIиркIра хъай са гIелимдилди. Ахъакьуная ми гIелимдис уч фи дард фай адинаяф ичин.

Ахттилатара акьуна са вахттунилас аттиная гIелим кIиркIра хъай. Багагь хаб шаб пуная ми бабас, зун вас пасе, фас ичин ве кIиркI гуниас аттархьунаяф. Мертти гъам хьуная бабас, са кар давайчин хаб багагь шаб пасдавуйи ми агъай, учикес аркьай хиялара ушуная мебур хулаъди. Кьабахъ ягъа багами дахи гъайшина, учIуная мебур рекуьъ.

Рукьугуна, гIелимди аттина пуная бабас, ве кIиркIа финикар ппара Iелде, гебури ацIас аркьа инсан, дехIела э гуни гьучадартаф. Накь фас пундавуйи вун зас, ягъа хаб гьемидегьен рекъ йирхIуне чин, пуная баба. Накь завас финикар майирцIана пас хьундава пуная гIелимди, фас пучин, зун учи Iелди уйи накь гебур. Гьегидегьен ширин емиш э финик.

Луиза Гусукаева 

Добавить комментарий

Ваш адрес email не будет опубликован. Обязательные поля помечены *