Са вахттра алттушуна адава хье дуньяйиъ дадарин хIа дегIви ккиркIуна. МехIелдис инсанарин фикирдиас, йиркIуралас ушуна адава дегIвин вахттари хье хIуькумати инсанарил адидегьен ягъарна-Iьушар, хьунадегьен азиятар, четинвелар. Гьелбетта мебурин зурбавелдин гьунарарихъас, хье ватан бадалди акьу загьматарихъас кIвал аркьай э хабар ирцIанде мукьариас, ликIиная китабарик. Амма ке удигьай хьес унихьа хье багулив фая хIа яшунин инсанарикес, хье нубатилди хьин ахъаркьа хье шиниккварис, хуттуларис.
ЯгIайин ягъас гьемиштти дегIвин хабарар хаб унихьая хьес хье хIуькуматинра Украинайин арабуриъ хьуна маслихIетсузвелдихъас. Алттушу иса 24-февральди хье хIуькуматти хъучучIуне «Специальная военная операция» Украинайиъ.
Хье хIуькуматиъ мобилизация вея пуна хьуне хабар сентябрьдин вазала. Гьер шагьурариас, районариас, хIурариас ушуне джигьил шиникквар СВОйиди чиппин ватандин удигь гьая бурдж йес, ислехIвелдин шартIар ухIас. Гьеме джалла аскерарин джалгабуригI гIая хье Агъул райондин гьер са мукьариъ дуламиш вея шиникквар. Сад гебурикес э Магомедов Вадим Джумалиевичра.
Магомедов Вадим Джумалиевичан бина э Агъул райондиъ ЯрIугIарин хIуриъас. Дад мин Магомедов Джумали Шабанович э. Баб Магомедова Сутари Магомедкасумовна, махьтабиъ кар аркьа мегIелим. Учихъ хъая хизанар Магомедова Насият Омаровна, хъара хьибуд шиникквара. Уч Вадим Джумалиевича кар аркьай уйи Агъул райондин Типпигъарин хIуриъ, ГБУ РД КЦСОНдин идарайиъ. Сифтта махьтабар ккиркIуфна сад, 2000-пе исалас 2002-пе исалди рукьуна ме хьуне Российин къушумдиъ, учин бурдж кедихьай. Хабди ме ушуне по контракту Дагъусттандиъ Ботлих агъа хIуриди 2007-пе исалас 2009-пе исалди. Алттушу иса хье хIуькуматиъ мобилизацин хабарар хьуфна сад, сентябрьдин вазала Вадим Джумалиевич ушуне Украинайиди учин ватан ухIас. Са чIалалди, ватандин удигь учин бурдж Вадима йиркIураастти кедихьуне. Ме кар асуллу э мис бицlигуна агу чишнайилас. Фас пучина, мин Iудар хIададари дженг дивуфе хье ватан бадалди. Гьемин бици чура икьрар акьуна 2012-пе исахъас хаб Балтийский флотилиъ аскервел аркьай ая.
ЯгIайин ягъас Вадим Джумалиевич рукьуная хулади, учин хизанилди, дадар бабарилди. Мин джандин сагъвелара иджи адава, контузия хьуна, хъара ибурин кьабахъ багус киркьуна унихьайра иджи адава. МехIелдис хаб вес ми фикир аркьай адава, джандин сагъвел дахьуна.
Наибет Гасукаева
