16 июньдиъ Дагъусттандин хIаф гъургъуне хье мухлукьдихъай, цац гIаттиная коронавирус агъа итталин аттархьуная дарман бадалди. Фас пучина, ме июньдин вазала хаб гъайшиная иттал. Иттатар ппара вея, эхIттият аркьай адава инсанари.
Сергей Меликова тIалаб аркьая джалла хье инсанарикес, ме иттал хаб бадил дахьас эхIттият акьуна кканде пуна, цац суман иттаттар ппара дахьас. КIвал акьуна цацан исаъ, ме иттали Iуьмур файшуная духттурар, Iусеттар, джегьилар дагъай. Миштти идегуна гьер инсанди фикир акьуна кканде учихъас,учин бугун-кIиларихъас. Хьес агьал ая мункивел гьерттис, ухIас уч ме итталиккес, руб йирхIуб — кумак э гьер инсандис, учис суман сасрабурисра.
Хье Дагъусттандин хIаттин хьуная тIалабихъас, суал алихьуне зун, Агъул райондин больницайиъ кар аркьая духттур-терапевт Гуриччай Джабаловнайис.
«Зун ппара рази э Дагъусттандин хIатти пе чIаларил инсанарин сагъвел бадалди гъургъуна. Фикир акьуна кканде гьер инсанди агьал ая ме итталин четинвеларихъас.
Зун хье больницайиъ кар аркъай ппара исар э, амма цацан исдегьен четин хьуф адава. Фас пучина, саннапуна гIаттине инсанарис чирхIе коронавирус агъа иттал. Духтурарин хIезурвел адавуйи миштин бетерис. КIиттар ппара хьуне. Ме исаъ атархьуная Iу джурайин дарман «Спутник V» хъара «Эпиваккорона» агъаттар, коронавирус итталигьас инсанарис ая мункинвел гьавайи йирхIуна ме иттал гьертти учигьас варха акьас. Ая хIуькуматар, гъуланттар ме итталин дарман йина ацIун пулара. Хьес хье хIукумати гьавайи фартая ме дарман. Зун магьа ме дарман хье больницайиъди файдигъилди, зас мункивел хьугъилди йирхIуне Iудар компонентар. Са фера хабар хьундава ме рубун, зун яш хьуная инсан ичира. Агьалра хье больницайиъ ая 600 доза ме дармандин, йирхIас хIезурди ая, кьастт акьуттарис. Ппара инсанар ая йирхIуттара, 598 инсанди садпе компонент йирхIуная, 547 инсанди — Iудпе компонент. Хъара хье больницайиъ ягъа гIуьфу инсандегьен ве ме итталин руб йирхIаттар. Варха хIурариъди вере бригада ая духттурарин вакцина фай, руб йирхас кканеттар ппара манзили душурай пуна. Иттал ккедихьас, зе тIалаб э вакцинация акьуб»,- пуне райондиъ ая хIа духттурди.
Наибет Гасукаева
