Фикир акьугуна ме дуьйилас гьер вахттари, гьер джуьрайин, гьер миллатарин дегIвибур ппара алайшуне. Амма ке хIа, ке зулуматинф хьуне мебурикес Ватандин ХIа дегIви. Дагъусттанра къерех хьундава ме дегIвигьас. Мисаъра дегIвин Iуьр дагу хизан илгундава.
Гьемихъас хье Гъалибвелдин ярцIурна ерхьидпе ис верегунас Дагъусттандиъ «Хье Игитар» агъа проект дахъасе.
Ме республикайин патриотарин проект Ватандин ХIа дегIвис суман, ДАССРдин верш исасра ухшар э. ДехIела хъучучIасе проект къанна ерхьидпе мартди хье вилаятин миллатарин сиясатинра диндин министерствойиъ.
Проект арайил аркьаф Дагъусттандиъ ая «Волонтеры Победы» агъа кIилди Россияйин джемеIетин движенин отделенира, РДйин Миннацдин кумакилдира хъара «Российская ассоциация Героев» агъа джемеIетин организацибри э.
Мебурин ахттилатарилди, ме кар арайил аркьаф хье джигьиларин ватанагьливел, джувабдарвел, пешакарвел алтухъ хьас, диндин цIуппе хьас, хъара хIаттарихъди, бицIиттарихъди хIуьлмат, нуьхIубат ппара хьас э. Мебурис ислехIвел ухIас, дегIви хьучин ватан ухIас ягIархьурай пуна.
Ведомствойиъ пуне, мисаъ хъара джуьре мегIракатара хьасе пуна. Профилактика экстремизмайин, терроризмайин джигьиларин арайиъ. Мактабариъ файшуна кканде пуне Игитвелдин дарсар, унахъуна Ватандин Игитарисра.
Ме карди кумак акьасе пуне хье шиниккварис дуз рекъуьъ архьуна, чиппин Iуьмур кIили гъас.

Салихат Малагусейнова