Даги, кьедибан, багниш (шиниккварис хIикат)

ЦIае ис багу вере ягъар джалла Iайи мекI-кулак аттар хьуна ая. Дараъ пучин, ппара хIа ибхьер акьуна уйи агъа. Е кьедибандифас, е дагифас, е багнишифас кIилин хIефттайиъ лек адикIас хьуна адавуйи агъа раккагьди.

Багагь цIае ис иде ягъа тIурфан яваш хьуф, дусттар завал хьуна ая кьедибандин хулаъ.

— Хьехъ елка хъадава, – пуна ая багниши.

— Хъадава, – пуна рази хьуна ая даги.

— Засра ай аргвайдава, – пуна ая кьедибанди.

— Ушуна, руцуна кканде, – пуна ая багниши.

— Агьал нанди джикIесе хьин ме? Дараъ мучIи ая, – муьхIтал хьуна ая даги.

— Ибхьра фидегьен хIаф ая! – хIа эл йирхIуна ая кьедибанди.

— Фиштти хьучира ушуна кканде елка гъас, – пуна ая багниши.

Аттушуна ая мебур хьибудара хулаас.

Амма зав къирибури фацуна уйи агъа, е ваз, е са гIад даргвай. Фера даргвахIела гъилар алдаркайра руцуна ая мебур. Гъиликк кичархьай хьуна ая хIаттар, бицIиттар ибхьиккди кичушуна ахьуна ая. ХIаф файшучинра кьедибандин хулаъ арукьасттава пуна адина ая мебур пушмалди фера фадавай.

Джуре хIаягъ ичин фера акьасттавуй, цIае ис фиштти хьасе елкара адавай пуна, гъам хьуна ая дусттарис.

Кьедибанди агьатуна чайра, агьийина ая багнишин удигь уьттан вакъра, фикир аркьая, гьалсара елка адайчира фера акьасттава агъай, сеIет адавай четин хьасе агъай, батIар акьас адесе пуная джакьвалара Iемалар акьуна рукьуна адава ге.

— Фитти ягIархьасе хьес сеIет цIеIуд хьегуна? — пуна ая багниши дусттарис.

— Хьес хабар хьасе, — джуваб йина ая даги.

– Фиштти э хьес хабар вереф? – тамаш хьуна ая багнишис.

— ЦIеIуд верегунас хьибудпе сеIет хьасе хьес гъархьас кканди ай, – пуна ая даги.

Кьедибан шад хьуна ая.

— Миштти идехаб, елкайихъас гьич гъам маркьа, зун гъузанасе мурттуъ, чун кейхь закес игрушкабур, — пуна ая кьедибанди.

Миштти акьунара ая мебури.

— Вун бизар хьун аду елка-кьедибан? – хабар гъушуна ая багниши.

— Адава, – шадтти джуваб йина ая ми.

— Хьимуд эгьан сеIет? – хабар гъуйуна ая кьедибанди.

— ЦIеIуд хьас гIифу минут аме мехIелдис, даги ахунигI гIачавея, мин ахун цIуппе хьугуна хьасе цIае ис, — пуна ая багниши.

— Айчин агьат хьес са чай, – пуна ая елка-кьедибанди.

Дагин ахун цIуппе хьегъилди «Уррраааа!» пуна гьарай аттархьа багнишинра кьедибандин.

Са гагьра гIаттудушуна, гъархьа багнишра.

Садтти илгванде кьедибан мурттуъ багамисттегьен, аркьай мегIнибура. ГучIай уйи мис ахунигI гIачушуна игрушкабур аргIас.

Салихат Малагусейнова

Добавить комментарий

Ваш адрес email не будет опубликован. Обязательные поля помечены *