Тегала зун ахъакьуне сус хьетил гъаре гIедатихъас. Мегела зун ахъакьасе чвас сус гъас ушубахъас. Сус гъас гъайикафе идемина дишагьли хьудегьен мукьу инсанарикес (сусна геда, рушна язна, хIа хуттулар).

Сус гъаре ягъа, багами, сус гъас вереттар  хъитIуна гъиларихъ ягълукъара, хумбари аркьай мегIнибур, кьавалара хъай верефе сусан хулаъди. Сусан хулаъди гьучарукьугуна гъас адиная идеми туфангиас йирхIуна заварис хабар акьай чаб адинаяф. Хабар хьуф гебуригьди гьачевей сусахъ хъая илар. Сус гъаре идеми киртIанде, гьучашаб агъай гебурис хунчабура фай, хъихьуна мегIнибура джигьилари аркьай лехъунар.

Акьуна эхъер, зарафатара джала ачаве хулаъди. Хулаъди ачушуфра лап мукьунттарикес сус гъас адинаттари киртIанде. КитIубар акьуна ккиркIуф аттгъа. Сус хулаас гимилди гъаредегьен гагьди сусахъ хъаяттари киртIанде сус гъас адинаттар.

Сусахъ хъая джигьилари, сус гъас адинаяттари хъихьуна мегIнибур аркьа лехъунар гъай сус гимилди. Гимил сус атуф сусахъ хъаяттари киртIанде наврузбеген дадна баб. Сус гъас ушунаттара, дадна бабра, джалла мукьунттара  аркьай тамашабура фай хIа хунчара, гьучаве сусаригьди.

Расим Гучудадов