Ме иса коронавирус агъа иттал гIаттина дихьи июньдихъди рукьасттегьен ппара маджлисар дакьуна амилгуне джемеIети. Гьал къадагъабура алтухъ андавагуна инсан алучIай ая учин кIваъ уйи кар бегьем акьас.
Гиштти э цIакIин аркьаттара. Хьидана, гIул башламиш акьугуна акьас дахьу цIакIинар джемеIети вахадну ягъ, сасра ягъ дагъай аркьай ая.
ЦIакIинарин ахттилат ккеттфайдеф, агъуларин са пай хIурариъ ая тамашин гIедатихъас ахъакьас кканди ая зас. Ме маджлис аркьагуна сусра наврузбег тахсир кIилар, халкь адина аве чиппин гьавара гъадивас, гебур агвасра кей цакIинихъди. Демарин ахир ве наврузбег учин сусахъай лихъугуна. Шагьурариъ дахи лихъуна ккиркIвайчинра, Агъулаъ алучIа ягъан Iекв амедегьен шадвелар дивас, лихъванде цIае хизан аркьаттар мучIинан къулгунин вахттар багу хьугуна.
Ке тамашинф — наврузбег лихъухаба сусахъай, мункиме ге гъилар гъадивас хъучадархьубра, багулив фая гьава гъадивас адина ая джигьилари ирхIас адатуна хъадиркIенде ге джалла джемеIетин удигьас. Гуджар аркьаттара аве гьадартай, амма хъадиркIенттарин гудж ппара ве, наврузбег гуланде. Гихъай ая тамадивасра фера акьас вейдава. Сус гъа хулаъди муулин макьам, лехъун аркьай.
Ахир кIил, сайин хулаъди файшуна IуьтIуб-ухуб акьуна гисаъ эркьва джалла джигьилар алчадина, е джин акьуна тамадивас кьимат фаттадивуна фартайдава наврузбег. Фидегьен фиппур хьучинра ахир иджеф ве.
Ге гIедатихъас пучина, мегIна фи ичина гин, зафас пас хьасттава, амма фиттихъас аркьаф ичина че фикирар зун агъихьасе. ЧIирхIевел ая гин, нагагь гуджлу джигилари, хъадиркIенгуна ппара аверефе гебур гисаъ, фикир дакьуна лекарикк кичархьуна, е чаб алгъадаркуна, зарар йиб мункиме джандис, гъил гъуянасра давереф суманф.
Уч гIедат хьуна аяф суман ве наврузбегесра, цIакIинихъди адина аяттарис къучмабур агвас, кумак ппара хъаяф агвар акьас, е тамадикес кьимат кетIас. Фиштти ичинра, авалан инсанари гебур аркьай чиппин элар ккертайи, алчушуб-алттушуб ппара аркьайи, хIуьлмат-нуьхIуьбат ппара уйи.
Нагагь Iайвел кея гIедат идехаба дахи аттархьуна ахьаси ге хье гьалдин Iуьммурдиас. Фиштти хьучинра, джигьиларин бахттар хьурай!
Камиль Мирзоев
