Гьер хизанарин арайиъ ая шиникквар — хьес йиная аманатар э. Шиниккв хугъилди дадар-бабарин йикIураъ ппара фикирар архьа, фиштти хьасегьан пуна мин Iуьмурдин рекъ. Амма йиркIуран мурадар хаб йирхIа шиникквдик итталин кIацI керхьугуна. Сара фиттихъасра фикир вейдава, шиникквдин сагъвелдихъас дала.

ХIейифвелдис, исалас иса авалдин вахттарихъ хъуттурфуна, дуьйиъ итта шиниккварин санра вартт хьуная. Ме иттаяттарин сандигI хье райондиасра гIая шиникквар.

Лидегьен ппара вахтт алттушуна адава джалла халкьдин сиварил хьуна хье ЧIаарин хIуриъ яшамиш вея Пирдамов Гасратали агъа итта шиниккв. Гасраталин дадар-бабари ме ерхьи истти ппара джан алийиная михъас. Чиппивас вередегьен тич-мич атай, кумакис чара аркьай. Гасраталин итталихъас хабар хьугъилди, джалла харджар михъас аркьа къайгъувел гъушуне учин гъилиъди хье райондин хIатти Закир Гусейнович Каидова. ЯгIайин ягъ э мебур мис кканеф, дакканф ахтармиш аркьай, хIаягъари аларуцас агъавей шиниккв дуламиш вей ая хулаъди ЧIаарин хIуриъ.

Ме нубатира садпе июньдиъ шиникквар ухIа Ягъан хIаягъа Гасраталилди аларуцас адина уйи хье райондин хIаф Закир Гусейнович администрациас Румина Омаровара хъай. Гьергелай мебур аларуцас адидегьен ме шиникквдин йиркIв шад ве, дадар-бабарин мушра керхьа чиппин валадис кумак хьасе пуна. Ме кардихъас Агъул райондин хIатти дадар-бабарис насихIет акьуне, сабур йине, учивас агърукьаф учи акьасе пуна.

Магьа хабра ерхьидпе июньдиъ рекъ ккея мебурис Москва шагьурдиъди вес.​

Гасраталин сагъвел бадалди мебур кьабул акьас Г.Н.Сперанскийдин ттуранихъ хъая ерчIудпе нумрайин бицIи шиниккварин клиническая больницайин Iудпе нумрайин филиалдиъ.

Ме нубатиъ ичира джалла инсанарин дуьгIейикк кичархьуна, акьу рубар-дарманарикес муфеIет йирай хье Гасраталис.

Батитай Габибулаева